काठमाडौं (हाम्रो खेलकुद)– अर्को वर्ष हुने रसिया विश्व कप अघि सडक तथा असहाय बालबालिकाको निम्ति विश्व कप फुटबल आयोजना हुँदैछ । त्यहि विश्व कप कपका लागि नेपाली टोलीको आज घोषणा भएको छ ।

रसियामा हुने विश्व कपमा एरोन कार्की, मनवीर लामा, विकास तिमल्सिना, रोशन भुषाल, रमेश शाह, सचिन विके, सन्तोष खत्री, हर्ष ठकुरी र पवन शाहीले नेपालको प्रतिनिधित्व गर्नेछन् । पाँच खेलाडीलाई वैकल्पिकमा राखिएको छ । सडक बालबालिकाको विश्व कप सन् २०१८ को मेमा हुनेछ ।

सडक बालबालिका तथा असहायको क्षेत्रमा काम गरिरहेको सेल्टर आश्रय नेपालले काठमाडौं आइतबार पत्रकार सम्मेलन गर्दै नेपाली टोलीको घोषणा गरेको हो । सेल्टरले विश्वकपको लागि लक्षित गर्दै गत भदौमा त्रिपुरेश्वर स्थित दशरथ रंगशालामा सडक बालबालिकाको लिग फुटबल आयोजना गरेको थियो ।

सोही लिगमा उत्कृष्ट प्रदर्शन गरेका खेलाडीलाई बन्द प्रशिक्षणमा राखि तीन हप्ताको प्रशिक्षणपछि नेपाली टोलीको घोषणा गरिएको हो । सेभेन ए साइडको फम्र्याटमा हुने विश्वकप आगामी बर्षको मे १९ देखि २७ तारिखसम्म रुसको मस्कोमा सडक तथा असहाय बालबालिकाको निम्ति विश्वकप फुटबल आयोजना हुदैछ ।

विश्वकपमा छात्र र छात्रा गरी १२–१२ टिमको सहभागिता रहेनेछ । २२ देशबाट २४ टिमको सहभागिता रहने यो विश्वकपमा नेपालले छात्र टिममा भाग लिन लागेको आयोजकले बताएको छ ।