सबिन शेर्मा
झापा – लक्ष्मी हुन्डाई मनाङ मस्र्याङ्दी क्लब झापाको झिलझिलेमा जारी सताक्षी गोल्ड कप फुटबल प्रतियोगिताको सेमिफाइनलमा पुगेको छ । रुपन्देही ११ लाई टाइब्रेकरमा ४–१ ले हराउँदै मनाङ सेमिफाइनलमा पुगेको हो । १–१ को बराबरीपछि मनाङले टाइब्रेकरमा बाजी मारेको हो ।

रुपन्देहीले पहिलो अग्रतालाई जोगाउन नसकेपछि टोली अन्तिम चार पुग्नबाट बाञ्चित रह्यो । अब मनाङले राष्ट्रिय टोलीका विक्रम लामा, विमल घर्तीमगर, अनन्त तामाङ, गोलकिपर विशाल श्रेष्ठ सम्मिलित आयोजक सताक्षीधाम स्पोर्टिङ क्लबको सामना गर्नेछ ।

आज खेलको छैटौं मिनेटमा अबाको गोलबाट रुपन्देहीले अग्रता बनाएको थियो । रजिन धिमालको प्रहार मनाङका गोलकिपर दीनेश थापा मगरको हातबाट फुत्केपछि रिबाउन्डमा अबाले गोल गरेका थिए । खेलको अन्त्यतिर मिनेट बाँकी रहँदा मनाङले बराबरी गोल फर्काएको थियो । ७९ औं मिनेटमा डोना थापाले फ्रिकिकमा बराबरी गोल फर्काएका थिए ।

टाइब्रेकर मनाङका विमल बस्नेत, कमल श्रेष्ठ, निराजन मल्ल र डोनाले गोल गरे । रुपन्देहीका लागि निरज बस्नेतले मात्र गोल गर्न सके । रजिन धिमालको प्रहार बाहिरिएको थियो भने विजय धिमालको प्रहार मनाङका गोलकिपर दीनेशले रोकेका थिए । मनाङका डोना खेलको म्यान अफ दी म्याच बने ।

प्रतियोगितामा झापा ११ र त्रिभुवन आर्मीबाट पनि सेमिफाइनल पुगिसकेका छन् । प्रतियोगिताको विजेताले ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।

सताक्षी गोल्ड कपको पहिलो सेमिफाइनल
झापाविरुद्ध त्रिभुवन आर्मी