काठमाडौं (हाम्रो खेलकुद) – राजधानीमा जारी प्रथम चन्द्रागिरी गोल्डकप फुटबल प्रतियोगिताको आज अन्तिम सेमिफाइनलमा ए डिभजन दुई टोली हिमालयन शेर्पा क्लब र त्रिभुवन आर्मी क्लबबीच प्रतिस्पर्धा गर्दैछन् । चन्द्रागिरी नगरपालिकाको नैकाप मैदानमा खेल दिउँसोको २ बजे सुरु हुने बताइएको छ ।

एपिएफसँगको खेलमा बल नियन्त्रणको प्रयासमा हिमालयन शेर्पाका हेमन गुरुङ । फाइल तस्बिर

आर्मीको सिनियर टोली हिजो मात्र एपिएफलाई हराउँदै झापाको झिलझिलेमा जारी सताक्षी गोल्ड कप फुटबल प्रतियोगिताको सेमिफाइनल पुगेको थियो । यता चन्द्रागिरीमा भने जुनियर टोली सेमिफाइनलमा पुगेको थियो । अर्को ए डिभिजन टोली जावलाखेल युथ क्लबलाई पेनाल्टीमा ५–३ ले हराउँदै आर्मीको बी टोली चन्द्रागिरी गोल्ड कपको सेमिफाइनलमा पुगेको थियो । हिमालयन शेर्पा अर्को ए डिभिजन क्लब नेपाल एपिएफको बी टोलीलाई ३–० ले हराएर अन्तिम चारमा पुगेको थियो ।

हिमालयनमा राष्ट्रिय टोलीका हेमन गुरुङ र मानबहादुर तामाङ तथा यू २३ का लक्ष्मण बिसी र यू १९ का कप्तान गोलकिपर अपर्ण कार्की रहेका छन् । आर्मीको जुनियर टोलीमा यू १९ का ४ खेलाडी रहेको बताइएको छ । आजको विजेताले उपाधिका लागि कुपण्डोलको अर्को ए डिभिजन टोली फ्रेण्डस् क्लबसँग प्रतिस्पर्धा गर्नेछ । सिएमजी क्लब संकटालाई हिजो १–० ले हराएर फेन्ड्सले अन्तिम दुईको यात्रा तय गरेको थियो । फाइनल मंगबार हुने आयोजक ब्राइट युथ क्लबका अध्यक्ष रमेश बुढाथोकीले जानकारी दिए ।

नेपाल जनरल मार्केट (हिरा) को मुख्य प्रायोजन, चन्द्रागिरी नगरपालिका, युनाइटेड सिमेन्ट प्रायोजक रहेको प्रतियोगिताको विजेताले उपाधिसहित ५ लाख र दास्रो हुने टोलीले २ लाख ५० हजार रुपैयाँ प्राप्त गर्नेछ । प्रतियोगिताको उत्कृष्ट खेलाडी र सर्वाधिक गोलकर्ताले समान ३० हजार पाउनेछन् ।