काठमाडौैं (हाम्रो खेलकुद) – चन्द्रागिरी गोल्ड कप फुटबल प्रतियोगितामा आजबाट सेमिफाइनल खेल सुरु हुँदैछ । चन्द्रागिरी नगरपालिकाको नैकापस्थित मैदानमा हुने पहिलो सेमिफाइनलमा ए डिभिजन दुई टोली फ्रेन्ड्स क्लब र सिएमजी क्लबबीच प्रतिस्पर्धा हुनेछ । खेल दिउँसो २ बजे सुरु हुनेछ ।

सिएमजी क्लब संकटाका खेलाडी । फाइल तस्बिर

फ्रेण्डस आयोजक ब्राइट युथ क्लबलाई ४–३ ले हराउँदै अन्तिम चारमा पुगेको थियो । अर्को तिर संकटाले नेपाल पुलिस क्लबको चुनौतिलाई २–० ले पन्छाएर अगाडि बढेको थियो । संकटाले घरेलु फुटबलमा गत वर्षको उच्च प्रदर्शनलाई निरन्तरता दिने संकेत देखाएको छ ।

गत वर्ष संकटाले मोफसलका अधिकांश नकआउट फुटबल प्रतियोगितामा भाग लिने क्रममा टोलीले ३ उपाधि जितेको थियो । यो वर्ष पनि टोलीले उपाधिको खाता खोलिसकेको छ । संकटाले केही दिनअघि नवलपरासीको कोल्हुवामा भएको राइनो संराक्षण गोल्ड कपको उपाधि जितेको थियो ।

विवादका कारण फ्रेण्ड्ससहित चार ए डिभिजन क्लब अखिल नेपाल फुटबल संघ (एन्फा) को कारवाहीमा परेको थियो । कारवाहीबाट भुक्त भएपछि फ्रेन्ड्सले केही प्रतियोगितामा भाग लिइसकेको छ । प्रतियोगितामा आइतबार त्रिभुवन आर्मी क्लब र हिमालयन शेर्पाबीच दोस्रो सेमिफाइनल हुनेछ । फाइनल खेल मंसिर ५ गते हुनेछ ।

प्रतियोगिताको विजेताले उपाधिसहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । प्रतियोगिताको उत्कृष्ट खेलाडी र सर्वाधिक गोलकर्ताले समान ३० हजार रुपैयाँ प्राप्त गर्नेछन् ।