काठमाडौं (हाम्रो खेलकुद)– त्रिभुवन आर्मी क्लब र नेपाल पुलिस क्लबले प्रधान सेनापति पाँचौ अन्तर्राष्ट्रिय महिला फुटबल प्रतियोगिता विजयी सुरुआत गरेका छन् । दुवै विभागिय टोली जितसँगै क्वार्टरफाइनल पुगेका छन् । भद्रकालीस्थित सैनिक खेल मैदानमा आजको पहिलो खेलमा आर्मीले पश्चिमाञ्चललाई र लगनखेलमा पुलिसले पश्चिमाञ्चललाई समान १२—० को अन्तरले हरायो ।

आर्मीको जितमा कृष्णा खत्री एक्लैले ७ गोल गरिन् । शर्मिला थापाले २ , दीपा राई, सपना लामा र अन्जली वाईवाले समान १ गोल गरे । कृष्णा वमन अफ दी म्याच घोषित भइन् । लगनखेलमा पुलिसलाई जित दिलाउन निर्मला विकेले ४ गोल गरिन् । निरु थापा र निर्मला उपाध्यायले समान २ तथा रुपा मगर, यशोदा लामा, विमला शेर्पा र सिर्जना खड्काले समान १ गोल गरे । निर्मला वमन अफ दी म्याच भइन् ।

क्वार्टरफाइनलमा आर्मीले भारतको सिक्किम तथा पुलिसले भारतको बिहारसँग प्रतिस्पधा गर्नेछ । दुवै खेल आइतबार हुनेछन् । सिक्किम र विहार दुवैले वाई पाएर अन्तिम आठमा प्रवेश पाएका थिए । नकआउटका आधारमा जारी प्रतियोगितामा पाँच विकास क्षेत्र, तीन विभागिय टोली र भारतका २ गरित १० टोलीको सहभागिता रहेको छ ।

नेपाली सेनाको आयोजना तथा अखिल नेपाल फुटबल संघको प्राविधिक सहयोग रहेको प्रतियोगिताको प्रधान सेनापति राजेन्द्र क्षत्रीले उद्घाटन गरे । प्रतियोगिता मंसिर ७ गते सकिनेछ ।

प्रधान सेनापति कपमा शनिबारको खेल
सुदुरपश्चिमाञ्चलविरुद्ध मध्यमाञ्चल
एपिएफविरुद्ध पूर्वाञ्चल