सबिन शेर्मा

झापा – रुपन्देही ११ दोस्रो सताक्षी गोल्ड कफ फुटबल प्रतियोगिताको क्वार्टरफाइनल पुगेको छ । झिलझिलेमा आज मोरङ ११ लाई ३–१ ले हराउँदै रुपन्देही अन्तिम आठमा पुगेको हो । अब रुपन्देहीले सेमिफाइनल प्रवेशका लागि आइतबार लक्ष्मी हुन्डाई मनाङ मस्र्याङ्दी को सामना गर्नेछ ।

रुपन्देहीको जितमा अफ्रिकी मुलका आबाले २ गोल र अर्को गोल विजयी धिमालले गरेका थिए । तर खेलमा सुरुआती अग्रता बने मोरङले लिएको थियो । खेलको १५ औं मिनेटमा सुनिल खड्काले गोल गर्दै मोरङलाई अघि बढाएका थिए । पहिलो हाफको अग्रतालाई जोगाउन टोली असफल भयो ।

४७ औं मिनेटमा आबाले बराबरी गोल फर्काए । उनले रुपेश केसीको पासमा गोल गरेका थिए । ७४ औं मिनेटमा आबाले नै अर्को गोल गरे । दास्रो गोलमा अमर डंगोलले पास मिलाइदिएका थिए । इन्जुरी समयमा विजयको गोलमा आबाले पास दिएका थिए । म्यान अफ दी म्याच घोषित आबाले १० हजार रुपैयाँ प्राप्त गरे ।

सताक्षी धाम स्पोर्टिङ क्लबको आयोजनामा जारी प्रतियोगितामा झापा ११ र आयोजक टोली सेमिफाइनल पुगिसकेका छन् । एपिएफ र आर्मीको विजेताले सेमिफाइनलमा झापाको सामना गर्नेछ । त्यस्तै रुपन्देही र मनाङको विजेताले आयोजक सताक्षीधामसँग प्रतिस्पर्धा गर्नुपर्ने हुन्छ । प्रतियोगिताको विजेताले ५ लाख र दोस्रो हुने टोलीले २ लाख ५० हजार रपैयाँ प्राप्त गर्नेछ ।

सताक्षी गोल्ड कपमा शनिबारको क्वार्टरफाइनल
एपिएफविरुद्ध आर्मी