काठमाडौं (हाम्रो खेलकुद) – एकै समय सञ्चालन भइरहेका दुई नकआउट फुटबल प्रतियोगितामा दुई विभागिय टोलीले भाग लिइरहेका छन् । नेपाल एपिएफ क्लब र त्रिभुवन आर्मी क्लबले राजधानीमा सञ्चालन भइरहेको चन्द्रागिरी गोल्ड कप र झापामा सञ्चालन भइरहेको सताक्षी गोल्ड कप फुटबल प्रतियोगितामाचुनौति पेश गरिरहेका छन् ।

दुवैले सिनियर टोलीलाई झापा पठाएको छ भने जुनियर टोली राजधानीमा प्रतिस्पर्धा गर्दैछ । यीनै दुई विभागिय टोलीले शनिबार झापामा क्वार्टरफाइनल खेल्दैछन् । एपिएफले भारत मध्य प्रदेशको डायमण्ड अफ फुटबल एकेडेमीलाई हराउँदै आर्मीसँगको भेट पक्का गरेको थियो । आर्मीले भने पहिलो चरणमा वाई पाएको थियो । एपिएफको सिनियर टोली एक साताअघि नवलपरासीमा सम्पन्न राइनो संरक्षण गोल्डकपको फाइनलसम्म पुगेको थियो ।

यता चन्द्रागिरीमा आर्मीको जुनियर टोली अन्तिम चारमा पुगिसेको छ । एपिएफको जुनियर टोली पनि सेमिफाइनल प्रवेशका लागि आज अर्को ए डिभिजन टोली हिमालयन शेर्पाको सामना गर्दैछ । हिमालयनमा राष्ट्रिय टोलीका दुई खेलाडी छन् भने उमेर समूहका २ खेलाडी छन् । टोलीले अन्य नयाँ खेलाडी जुटाएर टोली तयार पारेको छ । राष्ट्रिय टोलीका हेमन गुरुङ र मानबहादुर तामाङ तथा यू २३ का लक्ष्मण जसी र यू १९ का कप्तान गोलकिपर अपर्ण कार्की हिमालयनबाट आज खेल्दैछन् ।

उता एपिएफका प्रशिक्षक शुसिल अधिकारी बी टिम भएपनि आफ्नो टोली कडा चुनौतिको लागि तयार रहेको बताउँछन् । ‘हिमालयन शेर्पा राम्रो टोली हो’ प्रशिक्षक अधिकारी भन्छन्,‘तर हामी आफ्नोतर्फबाट शतप्रतिशत दिएर खेल्नेछौं ।’ चन्द्रागिरी नगरपालिकाको नैकाप खेल मैदानमा हिमालयन र एपिएफबीचको खेल दिउँसो २ बजेपछि शुरु हुनेछ । प्रतियोगितामा यो अन्तिम क्वार्टरफाइनल खेल हो ।

एपिएफ र शेर्पाबीचको विजेताले सेमिफाइनलमा आर्मीको जुनियर टोलीको सामनागर्नेछ । जावलाखेल युथ क्लबलाई पेनाल्टी सुटआउटमा हराउँदै आर्मी अघि बढेको थियो । अन्य दुई ए डिभिजन टोली फ्रेण्डस र सिएमजी संकटा पनि प्रतियोगिताको सेमिफाइनलमा पुगिसकेका छन् । ब्राइट युथ क्लब नैकापको आयोजनामा भैरहेको प्रतियोगिताको विजेताले उपाधिसहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ ।