म्याड्रिड (एजेन्सी)– गत साता चौथो सन्तानको पिता बनेका रोनाल्डो व्यक्तिगत अन्य अवार्ड प्रति त्यति चिन्तित छैनन् । तर, उनी ७ वटा ब्यालन डी’ओर अवार्ड र ७ सन्तानको पिता बन्न चाहान्छन् ।

फ्रानेस्ली मिडिया एल्इक्विपसँग रोनाल्डोले व्यक्तिगत अवार्डमा चासो गर्न छाडेको बताए । चार पटकका ब्यालन डी’ओर विजेता रोनाल्डो आफुले परिवारलाई धेरै प्राथमिकता दिन थालेको बताउन थालेका छन् ।

‘म करिब ३३ वर्षको भै सके , त्यसैले अब व्यक्तिगत अवार्डप्रति मेरो मोह घटेको छ , फुटबल मात्र अब मेरो संसार हैन , अन्य जिम्मेवारी बढेका छन्’, रोनाल्डोले भने , ‘ब्यालन डी’ओरलाई लिएर मा चिन्तित छैन , पाचौं पटक जित्नेमा म विश्वस्त छु ।’

उनले सन्तान र ब्यालन डी’ ओरप्रतिको आफ्नो मोह भने लुकाउन चाहेनन् । ‘म सात सन्तान चाहान्छु र त्यती नै ब्यालन डी’ओर जित्न चाहान्छु, उनले भने,‘ मैले खेलेसम्म सबै जित्न सक्ने सफलता पाउनेमा म आशावादी छु । ’

अर्कोतर्फ रियलको प्रदर्शनलाई लिएर आफु चिन्तित नरहेको पनि रोनाल्डोले प्रष्ट पारेका छन् । ‘अहिले हामीले केहि अंक गुमाएपनि सिजनको सुरुआत तिर भएकाले म चिन्ता गर्नुपर्ने अवस्था छैन,’ उनको विश्वास छ,‘ च्याम्पियन्स लिगमा प्रदर्शन राम्रो भइरहेको छ । ला लिगामा पनि पनि हामी लयमा फर्कन्छौं । ’