म्याड्रिड (एजेन्सी)– रियल म्याड्रिडका स्टार क्रिस्टियानो रोनाल्डो र कप्तान सर्जियो रामोसबीच पछिल्लो समय तिक्तता बढ्दै गएपछि क्लबको ड्रेसिङ रुममा विभाजन उत्पन्न भएको र सहकर्मीहरु पनि अलमलमा परेको बताइएको छ ।

सिजनको सुरुआतमा केही खेलाडीले क्लब छोडेसँगै रोनाल्डोको महत्त्व कम हुँदै गएको र रामोसको पक्षमा माहोल बन्दै गएकोमा उनी खुसी नरहेको एक्स्प्रेसको समाचारमा उल्लेख छ । रोनाल्डोका पोर्चुगिज सहकर्मी पेपे र फाबियो कोन्ट्राउले क्लब छाडेका थिए भने अर्का नजिकका साथी हामेस रोड्रिग्वेज लोनमा बायर्न म्युनिख गएका थिए ।

स्पेनिस राष्ट्रिय टोलीका समेत कप्तान रहेका रामोसले युवा खेलाडीहरुको निकै आदर र साथ पाएको बताइएको छ । जसमा नाचो, डानी कार्भाजाल, मार्को एसिन्सियो, इस्को, डानी केबालोस लगायत छन् । नेयमारलाई क्लबमा भित्र्याउने प्रयासमा रामोस पनि सकारात्मक देखिएपछि रोनाल्डो उनीसँग थप चिढिएको उल्लेख गरिएको छ ।

नेयमार रियलमा आएको खण्डमा रोनाल्डोको टोलीमा महत्त्व घट्ने र टोलीमा ठाउँँ सुरक्षित नरहने पनि अनुमान गर्न सकिन्छ । रियल यस सिजन राम्रो लयमा रहेको छैन । कमजोर सुरुआत गरेको रियल ला लिगामा शीर्ष स्थानको बार्सिलोना भन्दा ८ अंकले पछि रहेको छ भने च्याम्पियन्स लिगको पछिल्लो खेलमा टोटेनह्यामसँग पराजित भएको थियो ।