काठमाडौं (हाम्रो खेलकुद) – पहिलो संस्करणको चन्द्रागिरी गोल्डकप फुटबल प्रतियोगितामा आज विभागीय नेपाल पुलिस क्लब र सिमएजी क्लब संकटाबीच प्रतिस्पर्धा हुँदैछ । खेल नैकापस्थित चन्द्रागिरी नगरपालिकाको खेल मैदानमा दिउँसो २ बजेपछि शुरु हुनेछ ।

फाइनल तस्बिर

संकटा र पुलिसको खेल निकै प्रतिस्पर्धात्मक हुने अनुमा गरिएको छ । घरेलु फुटबलमा सफल इतिहास बोकेको पुलिस पछिल्लो केही वर्ष यता भने केही कमजोर रहँदै आएको छ । अर्को तर्फ सिएमजी क्लब संकटाले भने केही वर्षयता उच्च प्रदर्शन गरिरहेकोा छ । गत वर्ष मात्र संकटाले मोफसलका अधिकांश नकआउट फुटबल प्रतियोगितामा भाग लिएको थियो ।

संकटाले अघिल्लो सिजन तीन उपाधि जित्दै घरेलु फुटबलमा मनाङपछि आफुलाई अब्बल सावित गरेका थिए । संकटा एक साता अघि नवलपरासीको कोल्हुवामा सकिएको राइनो संराक्षण गोल्डकपको समेत च्याम्पियन हो । आजको खेल जित्ने टोली समूह ‘ए’ बाट सेमिफाइनलमा प्रवेश गर्नेछ ।

पुलिस र संकटा बीचको विजेताले फाइनल प्रवेशका लागि फ्रेण्डस क्लबको सामना गर्नेछ । फ्रेण्डसले यसअघि आयोजक ब्राइट युथ क्लबलाई ४–३ को गोल अन्तरमा पराजित गर्दै अन्तिम चारमा स्थान सुरक्षित गरेको थियो । अर्को समूहबाट त्रिभुवन आर्मी सेमिफाइनलपुगेको छ । आर्मीले बिहिबार जावलाखेल युथ क्लबलाई पेनाल्टी सुटआउटमा ५–३ ले पराजित गरेको थियो ।

ब्राइट युथ क्लब नैकापको आयोजनामा भैरहेको प्रतियोगिताको विजेताले उपाधिसहित ५ लाख, २ लाख ५० हजार रुपैयाँ प्राप्त गर्नेछ । प्रतियोगिताको उत्कृष्ट खेलाडी र सर्वाधिक गोलकर्ताले समान ३० हजार रुपैयाँ तथा हरेक खेलको ‘म्यान अफ दि म्याच’ ले ३ हजार रुपैयाँ पाउनेछन् । मंसिर ५ गतेसम्म सञ्चालन हुने प्रतियोगितालाई नेपाल जनरल मार्केट (हिरो) ले मुख्य प्रायोजन गरेको छ । प्रतियोगितालाई चन्द्रागिरि नगरपालिकाको युनाइटेड सिमेन्ट लगायतले प्रायोजन गरेको छ ।