काठमाडौं (हाम्रो खेलकुद) – ‘ए’ डिभिजन क्लब फ्रेण्डस् क्लब चन्द्रागिरीमा मंगलबारबाट शुरु भएको प्रथम चन्द्रागिरी गोल्डकपको सेमिफाइनलमा पुगेको छ । नैकापस्थित खेल मैदानमा भएको उद्घाटन खेलमा आयोजक ब्राइट युथ क्लबलाई ४–३ ले हराउँदै फ्रेण्डस्  अन्तिम चारमा पुगेको हो ।

फ्रेण्डस् को जितमा धिरज श्रेष्ठले ह्याट्रिक पूरा गरे । अफ्रिकी मुलका लावलले अर्काे एक गोल थपे । आयोजक ब्राइट युथ क्लबको लागि कप्तान समिर कार्की र साहिल रानाले गोल गरे । एक गोल आयोजकले उपहार पाएको थियो । प्रतिस्पर्धात्मक बनेको खेलको १७ औं मिनेटमा धिरजले गोल गरे ।

दोस्रो हाफको सुरुमा ब्राइट युथका कप्तान समिरले गोल गर्दै खेललाई बराबरीमा पुर्याए । ५२ औं मिनेटमा धिरजले गोल गरेपछि फ्रेण्डसले खेलमा फेरि अग्रता लियो । लगत्तै ब्राइट युथको प्रहार रोक्न खोज्दा हुदमुलमा फ्रेण्डसका खेलाडीले आफ्नै पोष्टमा गोल गर्दा खेल २–२ गोलको बराबरीमा पुगेको थियो ।

७० औं मिनेटमा धिरजले ह्याट्रिक गोल गर्दा खेलमा फ्रेण्ड्सले पुनः अग्रता बनायो । ७२ औं मिनेटमा ब्राइटका साहिल रानाले गोल गरेपछि खेल ३–३ गोलको स्थितिमा थप रोमाञ्चक बनेको थियो । त्यसको एक मिनेट नबित्दै विदेशी खेलाडी लावलले गोल गरेपछि फ्रेण्डसले फेरि खेलमा अग्रता बनायो र खेल जित्यो । धिरज श्रेष्ठ खेलको म्यान अफ दी म्याच घोषित भए र ३ हजार रुपैयाँ प्राप्त गरे ।

नकआउटका आधारमा हुने प्रतियोगितामा बुधबार समूह ‘बी’ अन्र्तगत त्रिभुवन आर्मी क्लब र जावलाखेल युथबीच हुने आयोजकले जनाएको छ । प्रतियोगितामा आयोजकसहित ‘ए’ डिभिजनका ७ टिमको सहभागिता रहेको छ । सहभागी टिमलाई दुई समूहमा विभाजन गरिएको छ । हरेक समूहका शीर्ष टोलीले फाइनलमा खेल्नेछ । समूह ‘ए’ मा ब्राइट युथ, फ्रेन्ड्स, पुलिस र संकटा छन् । आर्मी, जावलाखेल, हिमालयन र एपिएफ समूह ‘बी’ मा छन् ।

प्रतियोगिताको विजेताले उपाधिसहित ५ लाख र दोस्रो हुने टोलीले २ लाख ५० हजार रुपैयाँ प्राप्त गर्नेछ । प्रतियोगिताको उत्कृष्ट खेलाडी र सर्वाधिक गोलकर्ताले समान ३० हजार रुपैयाँ प्राप्त गर्नेछ । आयोजकले सहभागी टोलीलाई तयारी वापत ३० हजार रुपैयाँ प्रदान गरेको छ ।

युवा तथा खेलकुद मन्त्री राजेन्द्र कुमार केसी (राजन) ले प्रतियोगिताको उद्घाटन गरेका थिए ।