काठमाडौं (हाम्रो खेलकुद)– नेपाल र फिलिपिन्सबीचको एएफसी एसियन कप छनोट चरण अन्तर्गत आज एन्फा कम्प्लेक्समा भइरहेको खेलको पहिलो हाफ गोलरहित बराबरीमा टुंगिएको छ ।

समूह एको शीर्षस्थानमा रहेको फिलिपिन्सले केही अवसर पाएर पनि गोलको खाता खोल्न सकेको छैन । खेलेको सुरुआतमा केही समय हावी जस्तो देखिएको नेपाल खेलअघि बढ्दा रक्षात्मक अवस्थामा पुगेको छ । यस अघि पहिलो खेलमा नेपाल फिलिपिन्ससँग ४–१ ले पराजित भएको थियो । त्यो खेलमा रातो कार्ड पाएका विक्रम लामा आज पहिलो रोजाइमा परेका छन् ।

तर, यहि खेलमार्फत अन्तर्राष्ट्रिय खेल जीवनबाट सन्यासको घोषणा गरेका अनिल गुरुङ पहिलो रोजाइमा छैनन् । त्यस्तै अस्ट्रेलियाबाट बोलाइएका जगजित श्रेष्ठ पनि पहिलो रोजाइमा पर्न सकेनन् । हिजो प्रि म्याच कन्फ्रेन्समा जगजितलाई आफुले नबोलाएको भनेपछि उनको खेल्ने सम्भावना न्यून छ । मुख्य प्रशिक्षक ग्यातुको कोजीलेले जगजितका बारेमा एन्फालाई सोध्न भन्दै सञ्चारकर्मीलाई जवाफ दिएका थिए । जगजितले एन्फा अध्यक्ष नरेन्द्र श्रेष्ठले बोलाएर आएको बताएका थिए ।

माल्दिभ्सबाट व्यावसायिक फुटबल खेल्दै आएका गोलकिपर किरण चेम्जोङ र इन्डोनेसियाको पर्सिजा जकार्ताबाट खेल्नै आएका रोहित चन्द भने पहिलो रोजाइमा छन् । त्यस्तै फिलिपिन्सविरुद्ध १ मात्र गोल गर्ने विशाल राई पनि पहिलो रोजाइमा अटाएका छन् । अहिले सम्म नेपालले छनोटमा ९ गोल खाएको छ भने ३ गोल गर्न सकेको छ । अर्को गोल नेपालका लागि विमल घर्तीमगरले ताजकिस्तानविरुद्ध यहि सातदोबाटोको मैदानमा गरेका थिए ।

छनोटमा खेलेका यसअघिका ४ खेलमा नेपालले फिलिपिन्सविरुद्ध १ तथा ताजकिस्तानविरुद्धको २ खेल गुमाइसकेको छ । अर्को खेलमा यमनसँग गोलरहित बराबरी खेलेको थियो । फिलिपन्सको ८ अंक छ भने यमन र ताजकिस्तानको समान ६ अंक तथा नेपालको १ अंक छ ।