मिलान (एजेन्सी) – विश्वकपको प्ले अफ अन्तर्गत आज चार पटकको विश्व विजेता इटाली स्विडेनसँग भिड्दै छ । मिलानको गुइसेप मेजा स्टेडियममा खेलिने सो खेल नेपाली समय अनुसार १.३० बजे सुरु हुने छ ।

स्विडेनको घरेलु मैदानमा खेलिएको पहिलो लेगमा इटाली १-० ले पराजित भएको थियो । त्यसैले आज बराबरी वा पराजय भोगेको अवस्थामा इटाली सन् १९५८ यता पहिलो पटक विश्वकपमा छनोट हुन असफल हुने छ ।

इटालीका लागि मिडफिल्डर मार्को भेराट्टि यस खेलमा प्रतिबन्धित छन् भने डिफेन्डर लियोनार्डो बोनुचीको नाक भाचिए पनि अनुहारमा मास्क लगाएर खेल्ने छन् । सिमोने जाजा पनि घाइते रहेकाले खेलमा नखेल्न सक्छन् ।

त्यस्तै स्विडेनका लागि डिफेन्डर मिकाएल लुस्टिग पछिल्लो खेलमा प्रतिबन्धित थिए तर आजको खेलमा भने उनी फर्किने छन् । त्यसैगरी पछिल्लो खेलमा निर्णायक गोल गरेका जाकोब जोहान्सनले पनि सुरुवाती ११ मा स्थान पाउने देखिन्छ ।

इटालीको घरेलु मैदानमा स्विडेनले उसलाई पछिल्लो ५ खेलमा जित्न सकेको छैन । तर आज बराबरी पर्याप्त हुने भएकाले स्विडेनले रक्षात्मक खेल पस्किने अनुमान लगाउन सकिन्छ ।

स्विडेनले फ्रान्स रहेको समूहमा नेदरल्यान्ड्सलाई पछि पार्दै प्ले अफमा स्थान बनाउन सफल भएको थियो । इटाली भने आफ्नो समूहमा स्पेनसँग पछि पर्दै प्ले अफमा धकेलिएको थियो ।