काठमाडौं (हाम्रो खेलकुद)– नेपाली टोलीको एउटा प्रचलन स्थापित भैसकेको छ । राष्ट्रिय टोलीमा जति बेला अनिल गुरुङ उनै टोलीको कप्तान हुन्छन् । चोट वा अन्य कारण उनी टोलीमा नहुँदा टोली नेतृत्वको जिम्मेवारी विराज महर्जनको काँधमा जाने गर्दछ । यो प्रक्रिया चलेको लामो समय भइसकेको छ । यसपटक पनि फेरि सोही प्रक्रिया दोहोरिएको छ ।

एएफसी एसियन कपका पछिल्ला दुई खेलमा चोट कारण अनिल टोलीमा थिएनन् । त्यति बेला विराजले नै टोलीको कप्तानी गरे । भोली फिलिपिन्सविरुद्ध हुने टोलीमा अनिल समेटिए र उनले स्वतः कप्तानको जिम्मेवारी सम्हालेका छन् । फिलिपिन्सविरुद्धको खेलका लागि टोलीको घोषणा नहुँदा सम्म पछिल्लो खेलको आधार विराज नै कप्तान थिए । यसपटक भने अनिलका लागि केही फरक अनुभव हुँदैछ । उनीले फिलिपिन्सविरुद्धको खेलसँगै अन्तर्राष्ट्रिय खेल जीवनबाट सन्यास लिने बताइसकेका छन् ।

उनले आफ्नो अन्तिम खेलमा जित्ने आशा राखेका छन् । उनी फिलिपिन्सलाई हराउने नेपाली टोलीमा क्षमता रहेको बताउँछन् । ‘फिलिपिन्स हामीभन्दा धेरै बलियो टोली हो यो अहिले मात्रै हैन पहिले देखि नै हो ’ कप्तान गुरुङले भने, ‘समूहमा नेपाल पुछारमा रहेपनि मंगलबारको खेल नेपालको लागि महत्वपूर्ण छ । उनीहरुलाइृ जित्न मिहेनत गर्नुपर्छ ।’ अनिलले फुटबलको मेरुदण्ड लिग नहुँदा खेलाडी छनोटको लागि पर्याप्त विकल्प नभएको गुनासो पनि गरे ।

समूह ‘एफ’ मा रहेको नेपाल १ अंकसहित तालिकाको पुछारमा छ । फिलिपिन्स ८ अंकसहित शीर्ष स्थानमा छ । नेपाललाई पराजित गरे फिलिपिन्स पहिलो पटक एसियन कपको लागि छनोट हुनेछ । समूहमा यमन र ताजकिस्तानको समान ६ अंक छ ।