काठमाडौं (हाम्रो खेलकुद) – फिलिपिन्ससँग हुने भोलीका खेलमा नेपालको लक्ष्य भनेको आफ्नो स्तर सुधार्नेमा मात्रै सिमित रहेको छ । किन की नेपाल एएफसी एसियन कपको समूह चरणबाट बाहिरिसकेको छ । तर, नेपालले शीर्षस्थानमा रहेको फिलिपिन्सलाई घरेलु मैदानमा रोक्ने अवसर भने पाएको छ ।

अवे खेलमा गत चैतमा भोगको ४–१ को हारको बदला लिने मौका पाएको छ । खेल एन्फा कम्प्लेक्स सातदोबाटोको एस्ट्रो टर्फमा भोली २ बजे सुरु हुनेछ । नेपाली टोलीका मुख्य प्रशिक्षक जापानी ग्यातुको कोजीले पनि फिलिपिन्सलाई रोक्ने प्रयास गर्ने बताएकाा छन् । आज भएको प्रि म्याच कन्फ्रेन्समा उनले विगतमा रणनीतिमा खासै फरक नहुने पनि बताएका छन् ।

पुरानै रणनीतिमा खेलाउनु पर्ने बाध्यताका रुपमा कोजीले दुई मुख्य रक्षक देवेन्द्र तामाङ र आदित्य चौधरी चोटका कारण टोलीबाट बाहिरिनु लिएको छन् । ‘प्रशिक्षण दौरान दुई मुख्य रक्षक घाइते भए । टोलीको सन्तुलन मिलाउन अभ्यास गरिरहेका छौं ’ प्रशिक्षक कोजीले भने, ‘अघिल्ला खेलमा देखिएको कमजोरी हटाउन केन्द्रित छौं । भोली पुरानै प्रणालीमा खेलाउछौं । उनले फिलिपिन्सको स्तर नेपालको भन्दा माथी रहेकोले उनीहरुको स्तर छुन प्रयास गर्ने पनि बताए ।

समूह ‘एफ’ मा रहेको नेपाल १ अंकसहित तालिकाको पुछारमा छ । फिलिपिन्स ८ अंकसहित शीर्ष स्थानमा छ । नेपाललाई पराजित गरे फिलिपिन्स पहिलो पटक एसियन कपको लागि छनोट हुनेछ । समूहमा यमन र ताजकिस्तानको समान ६ अंक छ ।