काठमाडौं (हाम्रो खेलकुद)– अस्ट्रेलियामा बस्दै आएका जगजित श्रेष्ठले झन्डै डेढ वर्षपछि राष्ट्रिय फुटबल टोलीमा पुनरागमन गर्दा संयासको तयारीमा रहेका अनिल गुरुङ पनि समेटिएका छन् । एएफसी एसियन कप छनोट चरण अन्तर्गत फिलिपिन्सविरुद्ध मंगलबार हुने खेलका लागि आज २३ सदस्यीय टोलीको घोषणा हुँदा जगजित र अनिल परेका हुन् ।

अनिल ताजकिस्तानविरुद्धका अघिल्ला दुई खेलमा टोलीमा थिएनन् । उनी चोटमुक्त भएर फर्केसँगै टोलीमा परेका छन् । उनले फिलिपिन्सको खेलसँगै अन्तर्राष्ट्रिय खेल जीवनबाट सन्यास लिने बताइसकेका छन् । भोली खेले भने त्यो उनको ५० औं खेल हुनेछ । जगजित पछिल्लो एक वर्षदेखि अस्ट्रेलियन क्लबमा आबद्ध थिए ।

गत महिना ताजकिस्तानविरुद्धको खेलमा रहेका २३ मध्ये २० खेलाडी यथावत रहँदा ३ जनाले पुरागमन गरेका हुन् । जगजित र अनिलसँगै गोलकिपर विशाल पनि पुनः टोलीमा फर्केका छन् भने अर्का गोलकिपर एलन न्यौपाने बाहिरिएका छन् । अघिल्लो खेलमा रहेका रक्षकद्वय आदित्य चौधरी र देवेन्द्र तामाङ चोटका कारण यसपटक परेनन् ।

ग्यातुको कोजीको नेतृत्वमा राजु शाक्य र उज्वल मानन्धर रहेको प्रशिक्षण टोलीले गरेको अन्तिम छनोटमा बाँकी अधिकांश पुरानै खेलाडीले टोलीमा स्थान बनाएका छन् । समूह चरणका यसअघिका ४ खेलमा नेपालले ३ हार र १ खेलमा बराबरी गरेको थियो । पहिलो खेलमा नेपाल फिलिपिन्ससँग ४–१ ले पराजित भएको थियो ।

नेपाली राष्ट्रिय फुटबल टोली
गोलकिपर : किरण चेम्जोङ, विकेश कुथ, विशाल श्रेष्ठ

रक्षक: विराज महर्जन, रोहित चन्द, अनन्त तामाङ, कमल श्रेष्ठ, जितेन्द्र कार्की,राजेन्द्र रावल, दीनेश राजवंशी

मिडफिल्डर: सुजल श्रेष्ठ, विशाल राई, विक्रम लामा, अन्जन विष्ट, जगजित श्रेष्ठ, हेमन गुरुङ, हेमन्त थापा मगर,सुनिल बल

फरवार्ड: भरत खवास, विमल घर्तीमगर,अनिल गुरुङ, नवयुग श्रेष्ठ, जर्ज प्रिन्स कार्की