काठमाडौं (हाम्रो खेलकुद) – एएफसी एसियन कप छनोट चरणको पहिलो खेलमा नेपाल फिलिपिन्ससँग अवे खेलमा ४–१ ले पराजित भएको थियो । झन्डै ८ महिनापछि फेरि नेपालले फिलिपिन्सको सामना गर्दैछ । यसपटक घरेलु मैदानमा खेल हुन लागेको कप्तान विराज महर्जनले फिलिपिन्सविरुद्ध उच्च प्रदर्शनको आशा राखेका छन् ।

बन्द प्रशिक्षणमा रहेको नेपाली फुटबल टोली । तस्बिरः विवेक सुवेदी/हाम्रो खेलकुद

खेल मंगलबार सातदोबाटोस्थित एन्फा कम्प्लेक्सको एस्ट्रो टर्फमा हुनेछ । नेपाल छनोट चरणबाट बाहिरिसकेको छ भने फिलिपिन्स ८ अंकसहित शीर्षस्थानमा छ । कप्तान विराजले प्रशिक्षण राम्रो भएकोले भइरहेको र टोली फिलिपिन्सलाई हराउनमा दृढ रहेको बताएका छन् ।

‘सिचुएसन गाह्रो नै छ, हामी छनोटबाट बाहिरिसकेका छौं । उनीहरु छनोट नजिक छ ’ विराजले हाम्रो खेलकुद डटकमसँग भने, ‘जस्तोसुकै गाह्रो भएपनि हामी घरेलु मैदानमा फिलिपिन्ससँगै हार्ने पक्षमा नभई जित्ने लक्ष्यका साथ मैदान उत्रनेछौं । टफ फाइट हुनेछ ।’

अवे खेलमा पराजित भएपनि नेपाली टोलीले घरेलु मैदानमा उत्कृष्ट प्रदर्शन गर्दै आएको स्मरण गर्दै भने, ‘हामीलाई घरेलु दर्शकको साथ छ, दर्शकको साथले हामीलाई उत्प्रेरणा मिल्नेछ । सकेसम्म जित्ने प्रयास हुनेछ । नसके त्यतिकै हार मान्ने छैनौं ।’

उनले टोलीमा सन्तुलन रहेको र अघिल्ला खेलहरुमा देखिएको गल्तिलाई सुधार्नमा प्रशिक्षण केन्द्रित रहेको बताए । ‘अघिल्ला खेलमा डिफेन्समा कमजोरी देखिएको थियो, प्रशिक्षणमा अहिले डिफेन्सको मिस्टेकलाई कम गर्ने पक्षमा प्रशिक्षण भइरहेको छ ’ उनले भने, ‘फिलिपिन्सविरुद्धको खेलमा हाम्रो डिफेन्सलाई सुधारह हुनेछ, स्ट्राइकिङ लाइनले पनि पाएको अवसर सदुपयोग गर्नेमा म आशावादी छु ।’

यद्दपी, यसअघिका ४ खेलमा नेपालले २ गोल मात्र गर्न सकेको छ भने ९ गोल खाइसकेको छ । ताजकिस्तानसँग दुवै खेलमा हारेको नेपालले यमनसँग घरेलु मैदानमा गोलरहित बराबरी खेलेको थियो । यमन र ताजकिस्तानको समान ६ अंक भने नेपालको १ अंक छ ।