मस्को (एजेन्सी) – अर्जेन्टिना फुटबल टोलीका कप्तान लियोनल मेस्सीले अर्का अर्जेन्टिनी खेलाडी सिबासटियन ड्रुसीलाई नचिनेकोमा उनीसँग माफी मागेका छन् । जेनित सेन्ट्स पिटर्सबर्गका स्ट्राइकर ड्रुसीले मेस्सीसँग तस्बिर खिचाउँदा मेस्सीले उनलाई एक साधारण समर्थक मानेकोमा खेद प्रकट गरेका हुन् ।

मेस्सी हाल अर्जेन्टिनी टोलीसँग रुसको राजधानी मस्कोमा छन् । अर्जेन्टिनाका खेलाडी ड्रुसी आफ्नो राष्ट्रका खेलाडी भेट्न उनीहरु बसेको होटल पुगेका थिए । मेस्सीले ड्रुसीसँग फोटो खिचाएपनि उनलाई नचिनेकोमा मेस्सी निराश रहेको फक्स स्पोर्ट्स अर्जेन्टिनालाई बताएका हुन् । ड्रुसीले सामाजिक सञ्जाल इन्स्टाग्राममा उक्त फोटो हालेपछिमात्र मेस्सीलाई गल्तीको भान भएको अर्जेन्टिनी सुपरस्टार मेस्सीले बताए ।

‘मैले उनलाई चिनेपनि त्यस समयमा नचिन्दा म निराश छु । मलाई ड्रुसी को हुन् भन्ने थाहा थियो तर त्यस समय भने मैले उनलाई एक साधारण समर्थक रहेको सोचे । इन्स्टाग्राममा त्यस तस्बिर देखेपछि  मैले उनलाई माफी मागे  ‘ , मेस्सीले भने , ‘उनको र मेरो पहिले पनि कुरा भएको छ र हामि एकै ट्याटु आर्टिस्टसँग ट्याटु बनाउछौ।  त्यसैले म उनलाई राम्रोसँग चिन्छु । ‘

२१ वर्षीय ड्रुसी ४ वर्ष अर्जेन्टिनी क्लब रिभर प्यालेटबाट खेलेपछि हाल रुसको लिगमा जेनित सेन्ट्स पिटर्सबर्गबाट खेल्दैछन् । उनले अर्जेन्टिनी यू-१७ र यू-२० सँग गरेर २३ खेलमा ८ गोल गरेका छन् ।