ब्युनस आइरिस (एजेन्सी)– अर्जेन्टिना फुटबल टोलीका कप्तान लियोन मेस्सी अर्को वर्ष रसियामा हुने विश्व कपमा सन् २०१० को विजेता स्पेन र अर्जेन्टिना एकै समूहमा नपरोस् भन्ने चाहन्छन् । अर्को महिना विश्व कपको ड्र हुन लागेको सन्दर्भमा मेस्सीले यस्तो भनेका हुन् ।

जुलियन लोपेटेगुइको स्पेन अहिले फिफाको शीर्ष सात वरियतामा छैन । त्यसको अर्थ अब स्पेन सम्भवतः अर्जेन्टिना, ब्राजिल, जर्मनी वा फ्रान्स रहने कुनै एक समूहमा पर्ने सम्भावना रहन्छ । मेस्सी स्पेनलाई समूह चरणमै सामना गर्नु नपरोस् भन्ने चाहन्छन् किनकी उनको नजरमा स्पेन विश्वकै कठिन प्रतिद्वन्द्विमध्ये एक हो ।

‘यदि स्पेन हाम्रो समूहमा पर्‍यो भने त्यो हाम्रो लागि सबै भन्दा खराब ड्र हुनेछ ’ मेस्सीले भने, ‘म चाहन्छु उनीहरु हामीसँग नपरुन् । उनीहरु साँच्चै बलियो प्रतिद्वन्द्वि हुन् ।’ मेस्सीको नजरमा स्पेन, जर्मन, फ्रान्स र ब्राजिल सबैभन्दा बलिया प्रतिद्वन्द्वि हुन् र उनीहरुसँग व्यक्तिगत रुपमा क्षमतावान् खेलाडी रहेको पनि उनले बताए।

‘मलाई लाग्छ अहिलेको समयमा स्पेन, जर्मनी, फ्रान्स र ब्राजिल बलिया टोली हुन्, उनीहरुले उत्कृष्ट प्रदर्शन गरिरहेका छन् र त्यहाँ व्यक्तिगत रुपमा पनि प्रतिभावान् खेलाडी छन्’ मेस्सीले भने, ‘मलाई हामी छनोट हुन्छौं भन्नेमा विश्वास थियो । तर मलाई लागेको थियो कि हामी इक्वेडरसँगको खल अघि नै छनोट भइसक्ने छौँ ।’

अर्जेन्टिनाले छनोट चरणमा निकै संघर्ष गर्नु परेको थियो । छनोटको अन्तिम खेलको जितपछि मात्र अर्जेन्टिनाको विश्वकप यात्रा पक्का भएको थियो । अर्जेन्टिनाले शनिबार रुससँग मैत्रीपूर्ण खेल खेल्दै छ र त्यसपछि नाइजेरियाको सामना गर्नेछ ।