कोल्हुवा (हाम्रो खेलकुद) – ए डिभिजन क्लब सिएमजी क्लब संकटाले राइनो संरक्षण गोल्डकप फुटबल प्रतियोगिताको च्याम्पियन बनेको छ । सडन डेथमा अर्को ए डिभिजन टोली नेपाल एपिएफलाई ५–४ ले हराउँदै संकटा च्याम्पियन बनेको हो ।

नवलपारसीको कोल्हुवामा बिहीबार भएको फाइनलको निर्धारित समय १–१ को बराबरीमा टुगिएको थियो । पेनाल्टी सुटआउटमा पनि ४–४ बराबरी भएपछि खेलको निर्णय सडन डेथमा भएको थियो । सडन डेथमा संकटाका विनय श्रेष्ठ नायक बने । उनले एपिएफका टोपबहादुर विष्टको प्रहार रोकेका थिए ।

खेलमा लिएको अग्रता जोगाउन एपिएफ असफल भएको थियो । हरि कार्कीले २७ औं मिनेटमा गोल गरेपछि एपिएफले अग्रता लिएको थियो । तर, खेलको अन्त्यतिर संकटाले गोल गर्दै खेलमा फर्कियो । अफ्रिकी मुलका मार्टिन अजायीले खेल सकिन १४ मिनेट बाँकी रहँदा बराबरी गोल फर्काएका थिए ।

संकटाले उपाधिसहित ५ लाख २५ हजार ५ सय ५५ रुपैयाँ प्राप्त गर्यो । संकटाले एक दिनको होम स्टे तथा चितवन राष्ट्रिय निकुञ्जको अवलोकन भ्रमण गर्ने मौका पाएको छ । दोस्रो भएको एपिएफले २ लाख ५० हजार ५ सय ५५ रुपैयाँ प्राप्त गरे । वन तथा भु संरक्षण मन्त्रालयका सचिब युवध्वज जिसीले विजेता, उपविजेता टोलीका खेलाडीलाई पुरस्कृत ।

नन्द भाउजु मध्यवती उपभोक्ता समितीले राइनो संरक्षण गर्ने उद्देश्यसहित प्रतियोगिताको आयोजना गरेको हो । कार्तिक १३ गतेबाट सुरु प्रतियोगितामा ‘ए’ डिभिजन क्लबसहित १२ टोलीको सहभागिता थियो ।