काठमाडौं (हाम्रो खेलकुद) – दोस्रो संविधान सभा २०७० को निर्वाचनको परिणाम पछि राजेन्द्रकुमार केसी (राजन) ले धेरैको ध्यान खिचेका थिए । त्यसको कारण थियो, माओवादी केन्द्रका अध्यक्ष पुष्पकमल दाहाल प्रचण्डलाई उनले काठमाडौं क्षेत्रं १० को निर्वाचनमा हराएका थिए । राष्ट्रिय राजनीतिको केन्द्रमा रहेका प्रचण्डलाई हराउन सफल भएकै कारण केसीको चर्चा हुनु स्वभाविक थियो ।

प्रतिनिधि सभााका उम्मेदवार बायाँबाट क्रमशः खेलकुद मन्त्री राजन केसी, एनओसी अध्यक्ष जीवन राम श्रेष्ठ र एथलेटिक्स संघका अध्यक्ष राजीव विक्रम शाह ।

स्थानिय रुपमा सक्रिय राजनीति गरेपनि त्यो जितले केसीलाई देशव्यापी चर्चा दियो । यति बेला युवा तथा खेलकुद मन्त्री समेत रहेका केसी पुनः सोही क्षेत्रमा कांग्रेसको तर्फबाट प्रतिनिधि सभामा उम्मेदवार छन् । प्रचण्ड भने चुनाव लड्न चितवन पुगेका छन् । यसपटक विगतको जस्तो चर्चा काठमाडौं १० को चुनावमा छैन ।

केसी पनि चुनावी माहोल सुरु भइ नसकेको स्वीकार गर्दछन् । यसपटक बाम गठबन्धनका तर्फबाट माओवादी केन्द्रका हितमान शाक्यले केसीलाई चुनौति दिदैछन् । केसी भन्छन्, ‘चार वर्षअघि र अहिले दृश्य फेरिएको छ । त्यति बेलाको प्रतिस्पर्धा त्रिपक्षिय थियो । अहिले दुई पक्षिय छ ।’
खेलकुद मन्त्रीकै रुपमा निर्वाचन लड्दा पनि खासै फरक महसुस नभएको केसीले सुनाए । ‘मैले जे जति जिम्मेवारी पाए , त्यसलाई इमान्दारि पूर्वक निर्वाह गर्ने कोशिस गरेको छु ,’ उनले भने, ‘संविधान सभा सदस्य, व्यवस्थापिका संसदको सदस्य र पछिल्लो समय खेलकुद मन्त्रीका रुपमा मैले जे गरे सबैले महसुस गर्नु भएकै छ । म पदमा रहँदा वा नरहदा खासै अन्तर छैन ।’

मंसिरको १० र २१ गते हुने निर्वाचनमा नेपाली खेलकुदसँग छोडिएका मध्ये टिकट पाउने केसी एक्ला भने होइनन् । नेपाल ओलम्पिक कमिटी (एनओसी) का अध्यक्ष जीवनराम श्रेष्ठलाई नेकपा एमालेले काठमाडौं क्षेत्र नं ८ बाट उठाएको छ । उनका विरुद्धमा काँग्रेसका पूर्व उद्योग मन्त्री नवीन्द्रराज जोशी छन् । २०७० को निर्वाचनमा यी दुईबीचकै प्रतिस्पर्धामा जोशी विजयी भएका थिए ।

त्यस्तै नेपाल एमेच्योर एथलेटिक्स संघका अध्यक्ष राजीव विक्रम शाह जाजरकोटबाट कांग्रेसको उम्मेदवार छन् । उनी यसअघि पनि निर्वाचित भएका थिए । यसपटक भने उनको भिडन्त माओवादी केन्द्रका पूर्व गृहमन्त्री शक्ति बस्नेतसँग प्रतिस्पर्धा हुँदैछ ।

ओलम्पियन, खेलकर्मी वा कुनै समय नेपाली खेलकुदसँग जोडिएका अन्य १० जनाले भने प्रदेश सभाबाट टिकट पाएका छन् । राष्ट्रिय खेलकुद परिषद् (राखेप) का कोषाध्यक्ष रहेकै अवस्थामा ओलम्प्यिन सुरेन्द्र हमाल कांग्रेसबाट बाँके क्षेत्र नं २ को ‘ख’बाट उम्मेदवार बनेका छन् । ओलम्पियन हमाल भारोत्तलनका दक्षिण एसियाली खेलकुदका पदक विजेता खेलाडी हुन् । राखेप कोषाध्यक्षबाट उनले हालै राजीनामा दिएक छन् ।

प्रदेश उम्मेदवार माथि बायाँबाट क्रमश : मीनकृष्ण महर्जन, सुरेन्द्र हमाल, इन्द्रमान तुलाधर, केशव स्थापित र दीपक कोइराला ।
तल बायाँबाट क्रमश : महमद समिउल्लाह, टंक आङबुहाङ, बुद्धि कटुवाल,कुमार जंग थापा, किशोर राई ।

उपत्यकामा नेपाली कांग्रेसले खेलका दुई स्थापित नामलाई प्रदेश सभाको उम्मेदवार बनाएको छ । एन्फाका प्रमुख कार्यकारी अधिकृत इन्द्रमान तुलाधरले कांग्रेसबाट काठमाडौं क्षेत्र नं ९ को ‘क’ बाट प्रदेश सभाका लागि उम्मेदवारी दिएका छन् । लामो समयदेखि तेक्वान्दो प्रशिक्षक समेत रहेका तुलाधर ए डिभिजन क्लब सिएमजी संकटाका अध्यक्ष पनि हुन् । कांग्रेसले कराते मीनकृष्ण महर्जनलाई ललितपुर १ ‘ख’ बाट प्रदेश सभाको उम्मेदवार बनाएको छ । करातेका स्थापित नाम महर्जन राखेपका पूर्व कोषाध्यक्ष हुन् ।

राखेपका पूर्व सदस्य सचिव केशव स्थापितलाई एमालले काठमाडौं क्षेत्र नं ६ को ‘क’ प्रदेशको उम्मेदवार बनाएको छ । स्थापित काठमाडौं महानगरपालिकाका पूर्व मेयर हुन् । एन्फा उपाध्यक्ष किशोर राई कांग्रेसबाट सुनसरी क्षेत्र नं १ को ‘क’बाट प्रदेश सभाको उम्मेदवार बनेका छन् । राखेपका पूर्व सदस्य उनी लामो समयदेखि एन्फा उपाध्यक्षका रुपमा रहेका छन् ।

कांग्रेसले नै एन्फाका पूर्व महासचिव कुमारजंग थापालाई सुनसनरी क्षेत्र नै ३ को ‘क’बाट उम्मेदवार बनाएको छ । लामो समय एन्फामा रहेका थापा केही वर्षअघि बाट स्थानिय रुपमा राजनीतिमा सक्रिय हुँदै आएका थिए । त्यस्तै एन्फाका केन्द्रिय महमद समिउल्लाहले बारामा एमालेबाट टिकट पाएका छन् । राखेपका सदस्य समेत रहेका उनले बारा क्षेत्र नं ३ को ख बाट प्रत्यक्षमा बाट उम्मेदवारी दिएका छन् ।

नेपाल भलिबल संघका पूर्व कोषाध्यक्ष बुद्धि कटुवाल सुनसरी १ को खबाट कांग्रेसले उम्मेदवार बनाएको छ । नेपाल क्रिकेट संघ (क्यान) का पूर्व अध्यक्ष र पूर्व कार्यवहाक अध्यक्ष दुवैलाई माओवादी केन्द्रले उम्मेदवार बनाएका छ । क्यानका पूर्व अध्यक्ष ताप्लेजुङ ख र पूर्व कार्यवहाक अध्यक्ष दीपक कोइराला कास्की १ को कबाट उठेका छन् ।