काठमाडौं (हाम्रो खेलकुद) – नेपाली यू–१९ टोली एएफसी यू–१९ च्याम्पियनसिपको समूह चरणको अन्तिम खेलमा ओमानसँग पराजित भएको छ । किर्गिस्तानको विस्केकमा बुधबार भएको समूह चरणको अन्तिम खेलमा नेपाल ओमानसँग ५–० ले पराजित भएको हो ।

विस्केकमा एकपक्षीय बनेको खेलमा ओमानले पहिलो हाफमा ३–० को अग्रता बनाउँदा दोस्रो हाफमा थप २ गोल गर्दै ५–० को सहज जित निकाल्यो । ओमानसँगको हारसँगै समूह ‘ए’ मा नेपालले च्याम्पियनसिपमा जित, गोल र अंक जोड्न सकेन ।

च्याम्पियनसिपको सबै ४ खेलमा नेपालले हार बेहोर्‍यो । पहिलो खेलमा घरेलु टोली र्किगिस्तानसँग २–० ले पराजित भएको नेपाल दोस्रो खेलमा बहराइनसँग ४–० ले पराजित भएको थियो भने तेस्रो खेलमा युनाइटेड अरब इमिरेट्स (युएई)सँग १–० ले पराजित भएको थियो ।

नेपालले च्याम्पियनसिपका चार खेलमा एक गोल पनि गर्न सकेन भने १२ गोल खान पुग्यो । एक महिनाअघि भुटानमा भएको साफ यू–१८ च्याम्पियनसिप जितेको नेपाली टोली त्यसपछि एएफसी यु–१९ को छनोटको यात्रामा निस्केको थियो । अहिले टोलीमा अधिकांश यु–१८ च्याम्पियन टोलीका खेलाडी छन् ।

समूह ‘ए’को अन्तिम दुई खेल बाँकी रहँदा युएई ९ अंकसहित शीर्षस्थानमा छ । सबै ४ खेल खेलेको किर्गिस्तान र बहराइनको समान अंक भएपनि गोलअन्तरमा आयोजक दोस्रो स्थानमा छ । ओमान ७ अंकसहित चौथो स्थानमा छ । पुछारमा रहेको नेपालले खाता खोल्न सकेन ।

आज हुने समूहको अन्तिम खेलमा युएई र बहराइनबीच प्रतिस्पर्धा हुनेछ । छनोटमा समूहको शीर्ष स्थानमा रहने टोली सोझै फाइनलमा प्रवेश गर्नेछ । त्यस्तै दश समूहका विजेता र सबै समूहबाट उत्कृष्ट ५ उपविजेता राष्ट्रले आयोजकसँगै अन्तिम चरणमा प्रतिस्पर्धा गर्नेछन् ।