बार्सिलोना (एजेन्सी) – बार्सिलोनाका स्टार खेलाडि लियोनल मेस्सीले बार्सिलोनाको बोर्डलाई प्रिमियर लिगका दुई खेलाडि ल्याउन आग्रह गरेका बताइएको छ । त्यस्तै बर्सिलोनाका खेलाडिहरु बेचेर भए पनि ती खेलाडिहरुलाई भित्र्याउन पर्ने मेस्सीले बताएका भन्ने जनाइएको छ ।

इङ्ग्लिस पत्रिका डेलि स्टारका अनुसार मेस्सीले चुनेको दुई नाममध्ये एक नाम लिभरपुलका मिडफिल्डर फिलिप कौटिन्हो रहेको छ । सिजन सुरु हुन अघि बार्सिलोनाले कौटिन्होलाई भित्र्याउन कैयौं प्रयास गरे पनि सो प्रस्तावलाई लिभरपुलले अस्वीकार गरेको थियो ।

त्यस्तै अर्को प्रस्तावित नाम म्यानचेस्टर युनाइटेडका मिडफिल्डर एन्डर हरेराको रहेको जनाइएको छ । पल पोग्बा र निम्यान्या माटिचको उपस्थितिका कारण हरेरा युनाइटेडको पहिलो रोजाईमा खासै पर्न सकेका छैनन् ।

त्यस्तै हरेरा र कौटिन्हो भित्र्याउनका लागि बार्सिलोनाका दोस्रो रोजाईका केहि खेलाडिहरुलाई बेच्न मेस्सीले सुझाव दिएको उल्लेख छ । ती नाममा पाको अल्कासेर र आन्द्रे गोमेज रहेका छन् ।

यस साता सेभिल्ला विरुद्ध दुई गोल हाने पनि अल्कासेरले बार्सिलोनामा खेल्ने खासै मौका पाएका छैनन् । त्यस्तै ठुलो रकममा आएका गोमेजले पनि आफूलाई पहिलो रोजाईका रुपमा स्थापित गर्न सकेका छैनन् ।

बार्सिलोनाले यस सिजन ला लिगामा राम्रो सुरुवात गर्दै ११ खेलमा ३१ अंक बटुलेको छ । बार्सा दोस्रो स्थानमा रहेको भ्यालेन्सियाभन्दा चार अंक तथा प्रतिद्वन्दि रियल म्याड्रिडभन्दा ८ अंकले अगाडि रहेको छ ।