म्याड्रिड (एजेन्सी)– रियल म्याड्रिडका स्टार क्रिस्टियानो रोनाल्डोले ला लिगामा यो सिजन खासै प्रभाव जमाउन सकेका छैनन् । यद्दपी टोलीका मिडफिल्डर कासिमेरो भने आउने दिनमा रोनाल्डोले गोल गर्नेमा विश्वस्त छन् । उनले रोनाल्डोको समर्थनमा भने,‘आउने दिनमा हामीले उनले गोल गरेको देख्न पाउने छौ, यसमा चिन्तित हुनु पर्ने केही कारण छैन ।’

३२ वर्षे रोनाल्डोले यो सिजन ला लिगाका ७ खेलमा १ गोलमात्र गरेका छन् । गए राति लास पामासलाई रियलले ३–० ले हराउँदा रोनाल्डोले गोल गरेनन् । यद्दपी उनले एउटा एसिस्ट भने गरेका थिए । त्योसँगै उनले क्लबका लागि सर्वाधिक ८४ एसिस्ट गरेका छन् । ‘ उनी जहिले गोल गर्ने प्रयासमा हुन््छन् । उनले मेरो लागि पनि मौका सृजना गर्नका लागि सधै तयार रहन्छन्,’ कासिमेरोले भने, ‘आउने दिनमा रोनाल्डोले पर्याप्त गोल गर्नेछन् । यसमा चिन्ता लिनु पर्ने कारण म देख्दिन ।’

रियलका महत्वपूर्ण सदस्य बनिरहेका ब्राजिलियनले करिम बेन्जेमाको पनि समर्थनमा बोले । ‘ ९ नम्बर जर्सी लगाउने विश्वका उत्कृष्ट खेलाडीमा उनी पर्दछन् ’ उनले थपे, ‘उनले अहिले राम्ररी खेलिरहेका छन् । मलाई विश्वास छ आउने दिनमा उनले पनि गोल गर्नेछन् । हिजोको जितपछि ११ खेलमा २३ अंकका साथ रियल तेस्रो स्थानका कायम छ । शीर्षस्थानको बार्सिलोनाभन्दा रियलको अझै ८ अंक कम छ ।