म्यानचेस्टर (एजेन्सी) – प्रिमियर लिगमा अग्रस्थानमा रहेको म्यानचेस्टर सिटीले आर्सनललाई ३-१ को अन्तरले हराएको छ । सिटीका लागि केभिन डे ब्रुयन, सर्जियो अगुएरो र ग्याब्रियल जेससले गोल गरेका थिए ।

खेलको १९ औं मिनेटमा फर्नान्डिन्होको पासमा डे ब्रुयनले सुन्दर गोल गर्दै घरेलु टोलीलाई अग्रता दिलाएका थिए । त्यस्तै दोस्रो हाफको सुरुवाती मिनेटतिर आर्सनलका डिफेन्डर नाचो मोनरियालले रहिम स्टेर्लिङलाई लडाएकाले सिटीले पेनाल्टी पाएको थियो ।

सो पेनाल्टीलाई गोलमा परिणत गर्दै अगुएरोले आफ्नो लिग सिजनको आठौं गोल पनि गरे । सब्स्ट्युटिट्युसनबाट आएका आर्सनलका फरवार्ड एलेक्जान्डर लाकाजेटले आर्सनलका लागि एक गोल फर्काए पनि सिटीले थप एक गोल गर्दै जित सुनिश्चित गरेको थियो ।

सब्स्ट्युटिट्युसनबाटै आएका ग्याब्रियल जेससले डेभिड सिल्भाको पासमा सिटीको तेस्रो गोल गरेका थिए । यस जितसँगै सिटीले आफ्नो ११ खेलबाट ३१ अंक जोडेको छ र अग्रस्थानमा आफ्नो पकड अझ बलियो बनाएको छ । त्यस्तै आर्सनल भने अंकतालिकाको छैठौं स्थानमा झरेको छ ।

यस अघि सन हिउङ-मिनको निर्णायक गोलमा टोटनह्याम क्रिस्टल प्यालेससँग १-० ले विजयी भएको थियो । टोटनह्याम तालिकाको तेस्रो स्थानमा यथावत् रहेको छ ।