काठमाडौं (हाम्रो खेलकुद) – अस्ट्रेलिया बस्दै आएका मिडफिल्डर जगजित श्रेष्ठ झन्डै डेढ बर्षपछि नेपाली राष्ट्रिय फुटबल टोलीको बन्द प्रशिक्षणमा समावेश भएका छन् । अर्को साता फिलिपिन्सविरुद्ध हुने एसियन कप छनोटको लागि सुरु भएको प्रशिक्षणमा जगजित आइतबार सामेल भएका हुन् । अलिख नेपाल फुटबल संघ (एन्फा) ले बन्द प्रशिक्षणका लागि बोलाएपछि उनी शुक्रबार स्वदेश आइपुगेका हुन् ।

जगतिज श्रेष्ठ । फाइल तस्बिर

राष्ट्रिय टोलीको बन्द प्रशिक्षणमा फर्कन पाउँदा खुसी लागेको जगतिजले हाम्रो खेलकुद डट कमलाई बताए । ‘लावससँगको मैत्रीपूर्ण खेलपछि म पहिलो पटक टोलीमा बोलाइएको छु । दुई साता अघि एन्फा अध्यक्ष नरेन्द्र श्रेष्ठले फोन गर्नु भएको थियो । एकदम खुसी लागेको छ । एउटा खेलाडी जहिले पनि राष्ट्रिय टोलीबाट खेल्न इच्छुक हुन्छ ’ उनले भने, ‘शत प्रतिशत दिएर टोलीको अन्तिम छनोटमा पर्ने मेरो प्रयास गर्नेछु । ’ नेपाल र लावसबीच सन् २०१६ को मेमा मैत्रीपूर्ण खेल भएको थियो ।

अस्ट्रेलियामा केही महिना अघि सम्म नुवावाडिङबाट व्यवसायिक फुटबल खेलेका उनले भने, ‘म फिट नै छु । अझै हुने कोशिस गर्नेछु । मेरो लक्ष्य भनेको अन्तिम छनोटमा परेर पहिलो रोजाइमा पर्ने हुनेछ ।’ नुवावाडिङ अस्ट्रेलियामा उनको तेस्रो क्लब हो । गत बर्षको सुरुआत तिर अस्ट्रेलिया पुगेका जगजितले साउनमा भिक्टोरिया स्टेटको ‘बी’ डिभिजन टोली ह्युम युनाइटेड एफसीबाट तीन महिना खेलेका थिए । त्यसपछि उनी एनपिएलको अर्को टोली सनसाइन क्रस एफसीमा आबद्ध भएका थिए ।

केही बर्षअघि हिमालयन शेर्पाको पहलमा उनी जर्मनी गएर केही साताको अभ्यास गरेर फर्केका थिए । नेपालले दुई बर्ष दुई महत्वपूर्ण उपलब्धी हासिल गर्दा जगगित पनि टोलीका सदस्य थिए । २०७२ को फागुनमा भारतमा १२ औं दक्षिण एसियाली खेलकुद (साग) मा यू २३ ले स्वर्ण पदक जित्नुअघि राष्ट्रिय टोलीले माघमा बंगलादेशमा बंगबन्धु गोल्डकप जित्दा जगजित टोलीमा थिए ।

गत बर्षले नेपालले एएफसी सोलिडारिटी कप जित्दा भने उनी टोलीमा थिएनन् । पटक पटक राष्ट्रिय टोलीबाट देशको प्रतिनिधित्व गरिसकेका नेपाली यू २३ का पूर्व कप्तान जगजितले फिलिपिन्ससँगको खेल पछि पुनः अस्ट्रेलिया फर्कने बताए । एसियन कप छनोटको समूह चरणको शीर्षस्थानम रहेको फिलिपिन्स र नेपालबीच कात्तिक २८ गते राजधानीमा प्रतिस्पर्धा हुँदैछ ।

फिलिपिन्ससँगको पहिलो लेगमा नेपाल ४–१ ले पराजित भएको थियो । समूह एफमा फिलिपिन्स ८ अंकसहित शीर्षस्थान छ भने समान ६ अंक भएका यमन र ताजकिस्तान क्रमशः दोस्रो र तेस्रो स्थानमा छन् । अन्तिम २ खेल बाँकी रहँदा नेपाल १ अंकसहित पुछारमा छ ।