म्याड्रिड (एजेन्सी) – स्पेनिश ला लिगाको चौथो स्थानमा रहेको साविक विजेता रियल म्याड्रिड आज १९ औं स्थानमा रहेको लास पाल्मासको सामना गर्दै छ । रियल म्याड्रिडको घरेलु मैदान स्यान्टियागो बर्नबाउमा खेलिने यस खेल नेपाली समय अनुसार रातिको १.३० बजे सुरु हुने छ ।

रियल म्याड्रिडका गोलकिपर केलर नाभास यस खेलमा घाइते रहेका कारण किको क्यासिल्लाले उनको स्थान लिने देखिन्छ । त्यस्तै राफायल भरान र ग्यारेथ बेल पनि घाइते रहेकाले खेलमा सहभागी हुने छैनन् । लास पाल्मासका तर्फबाट जोनाथन भियरा घाइते छन् भने एलेन हालिलोभिच पनि चोटग्रस्त छन् ।

रियल म्याड्रिडले आफ्नो पछिल्लो घरेलु खेल जिरोनासँग गुमाएको थियो भने च्याम्पियन्स लिगमा पनि टोटनह्याम विरुद्ध पराजय भोगेको थियो । त्यसैले आज निकै खराब लयबाट गुज्रिरहेको लास पाल्माससँग रियललाई जित अति आवश्यक देखिन्छ ।

लिगमा लगातार ६ हार बेहोरेको लास पाल्मासले रियललाई आफ्नो पछिल्ला ५ खेलमा हराउन सकेको छैन भने रियल पछिल्ला २९ मध्ये २७ घरेलु खेलहरुमा अपराजित रहेको छ ।

ला लिगामा खेलिने अन्य खेलहरु:

लेभान्टे विरुद्ध जोरोना – ४.४५ बजे

सेल्टा भिगो विरुद्ध एथ्लेटिक बिल्बाओ – ९ बजे

रियल सोसिएडाड विरुद्ध एबार – ११.१५ बजे

भिल्लारियल विरुद्ध मालागा – ११.१५ बजे