एन्जर्स (एजेन्सी) – फ्रान्सेली लिग १ को अग्रस्थानमा रहेको पेरिस सेन्ट जर्मन (पिएसजी) ले एन्जर्सलाई ५-० को फराकिलो अन्तरले हराएको छ । पिएसजीको जितमा एडिन्सन काभानी र किलियन बाप्पेलेले दुईदुई गोल गरे ।

पिएसजी खेलको पाँचौं मिनेटमै अग्रता लिन सफल भएको थियो । ड्यानि एल्भेसले गरेको क्रसलाई सदुपयोग गर्दै किलियन बाप्पेले पिएसजीलाई अग्रता दिलाएका थिए । त्यस्तै खेलको १४ औं मिनेटमा एल्भेसकै पासमा जुलियन ड्राक्सलरले सुन्दर गोल गर्दै आफ्नो टोलीको अग्रता दोब्बर बनाएका थिए ।

यसै गरी खेलको ३० औं मिनेटमा पिएसजीका मुख्य स्ट्राइकर काभानीले बाप्पेको पासमा गोल गर्दै पिएसजीका लागि लिग १ मा आफ्नो १०० गोल पनि पूरा गरे । सो उपलब्धि यस अघि ज्लाटान इब्राहिमोभिचले मात्र हांसिल गरेका छन् ।

दोस्रो हाफमा पनि पिएसजी थप दुई गोल गर्न सफल रह्यो । ६० औँ मिनेटमा ड्राक्सलरको पासमा पुन: काभानीले गोल गर्दै स्कोर ४-० बनाए र यस लिग सिजनको आफ्नो तेह्रौं  गोल खातामा जोडे ।

त्यस्तै खेलको अन्तिम समयतिर बाप्पेले खेलको आफ्नो दोस्रो गोल गर्दै पिएसजीका लागि ३ अंक पनि सुनिश्चित गरे । स्टार खेलाडि नेयमार यस खेलमा चोटका कारण नखेले पनि अग्रपंक्तिमा उनको अभाव बिरलै खड्कियो ।

यस जितसँगै पिएसजीको १२ खेलमा दश जित तथा दुई बराबरीसहित ३२ अंक रहेको छ । यसक्रममा उसले ३९ गोल गरेको छ भने केवल ८ गोल खाएको छ । एन्जर्सको भने १२ खेलमा केवल १३ अंक रहेको छ ।