एन्जर्स (एजेन्सी) – फ्रान्सेली लिग १ मा आज अंक तालिकाको शीर्ष स्थानमा रहेको पेरिस सेन्ट जर्मन (पिएसजी) तेह्रौं स्थानको एन्जर्ससँग भिड्दै छ । एन्जर्सको घरेलु मैदानमा खेलिने यस खेल नेपाली समय अनुसार ९.४५ बजे सुरु हुने छ ।

पिएसजीका प्रशिक्षक उनाई एम्रिले आज आफ्ना स्टार खेलाडि नेयमार चोटका कारण खेलमा सहभागी नहुने बताएका छन् । एम्रिले नेयमार कति समयका लागि खेल्न नसक्ने भने जनाएका छैनन् ।

त्यस्तै थियागो मोट्टा पनि घाइते रहेका छन् भने एन्जल डि मारिया पारिवारिक कारणले खेलमा भाग लिने छैनन् । यस कारण जुलियान ड्राक्सलर र जाभियर पास्टोरेले आज टोलीमा स्थान पाउने देखिन्छ । च्याम्पियन्स लिगमा ह्याट्रिक गरेका लेभिन कुर्जावा पनि सुरुवात गर्न सक्नेछन् ।

एन्जर्सका लागि डिफेन्डर योआन आन्द्रेउ यस खेलमा प्रतिबन्धित छन् । घरेलु टोली यस सिजन लिग १ का आफ्ना ११ खेलमा केवल दुईमा जित्न सफल भएको छ भने ७ खेल बराबरी पनि खेलेको छ ।

एन्जर्सले आफ्ना पछिल्ला ५ घरेलु खेल जित्न सकेको छैन भने पिएसजीसँगका पछिल्ला ४ खेल पनि गुमाएको छ । यस सिजन ११ खेलमा ९ जित दर्ता गर्दै ३४ गोल पनि गरेको पिएसजी भने आफ्नो बलियो लयलाई निरन्तरता दिने खोजीमा हुने छ ।

आज लिग १ मा खेलिने अन्य खेलहरु:

ट्रोयस विरुद्ध स्ट्रासबर्ग – १२.४५ बजे

मोनाको विरुद्ध गुइनग्याम्प – १२.४५ बजे

मोन्टपिलेर विरुद्ध एमियन्स – १२.४५ बजे

नान्टेस विरुद्ध टुलोस – १२.४५ बजे