लण्डन (एजेन्सी) – प्रिमियर लिगमा आज राति अंक तालिकको छैठौंमा रहेको लिभरपुल १६ औं स्थानको वेस्ट ह्यामसँग भिड्दै छ । वेस्ट ह्यामको घरेलु मैदान लण्डन स्टेडियममा खेलिने यस खेल नेपाली समयअनुसार रातिको ११.१५ बजे सुरु हुने छ ।

लिभरपुलका केहि मुख्य खेलाडिहरु घाइते रहेकाले प्रशिक्षक जर्जेन क्लप समस्यामा छन् । एडम लालाना र फिलिप कौटिन्हो लिभरपुलका लागि घाइते छन् भने स्टार खेलाडि साडियो माने ट्रेनिङमा फर्किए पनि सुरुवात भने गर्न सक्ने छैनन् ।

त्यस्तै घरेलु टोलीका लागि पनि उस्तै समस्या रहेको छ । वेस्ट ह्यामका ४ मुख्य डिफेन्डर यस खेलमा उपलब्ध नहुन सक्छन् । पाब्लो जाबालेटा प्रतिबन्धित छन् भने विन्स्टन रिड, जोसे फोन्टे र जेम्स कोलिन्स घाइते रहेका छन् ।

गत साता खेलको अन्तिम मिनेटमा गोल खाँदै वेस्ट ह्याम क्रिस्टल प्यालेससँग २-२ को बराबरीमा रोकिएको थियो । त्यस्तै लिभरपुल भने टोटनह्यामसँगको ४-१ हारपश्चात गत साता लिगमा हडर्सफिल्डमाथि ३-० को जित दर्ता गर्न सफल भएको थियो ।

आज प्रिमियर लिगमा खेलिने अन्य खेलहरु:

स्टोक सिटी विरुद्ध लेस्टर सिटी – ६.१५ बजे

साउथह्याम्पटन विरुद्ध बर्नली – ८.४५ बजे

न्यूकासल युनाइटेड विरुद्ध बर्नमाउथ – ८.४५ बजे

हडर्सफिल्ड विरुद्ध वेस्ट ब्रोम – ८.४५ बजे

स्वान्सि सिटी विरुद्ध ब्राइटन – ८.४५ बजे