बिल्बाओ (एजेन्सी) – ला लिगामा गए राति एथ्लेटीक बिल्बाओलाई २–० ले हराउँदै बार्सिलोनाले शीर्षस्थानको पकडलाई थप बलियो बनाएको छ । लियोनल मेस्सी र पौलिन्होले बार्सिलोनाका लागि गोल गरे । गोलकिपर टर स्टेगेनले उच्च प्रदर्शन गर्दै बार्सिलोनालाई जित दिलाउन मद्धत गरे ।

मेस्सीले खेलको ३६ औं मिनेटमा सिजनको १२ औं गोल गर्दै बार्सिलोनालाई अग्रता दिलाएका थिए । घरेलु टोलीले थुप्रै पटक खेलमा फर्कने प्रयास गरेपनि बार्सिलोनाको गोलकिपर स्टेगेनले बार्साको अग्रता जोगाएका थिए । अरिज अडुरिचलाई वोन अन वोनमा रोक्दै पहिलो हाफमा बार्सिलोनालाई जोगाएका जर्मन गोलकोपर स्टेगेनले दोस्रो हाफमा पनि अडुरिचको हेड मार्फतको प्रयासलाई विफल पारेका थिए । रियलसँग सुपर कपमा पराजय भोगेयता  उत्कृष्ट प्रदर्शन गरेका स्टेगेनले १३ खेल यता सिजनको १० औं क्लिन सिट हात पारेका हुन् ।

दोस्रो हाफमा गोल गर्दै बराबरी गर्न प्रयासरत बिल्बाओका लागि राउल गार्सियाको प्रहार बारमा लागेर बाहिरिएको थियो । पौलिन्होले खेलको इन्जुरी समयमा बार्सिलोनाको अग्रता दोब्बर गर्दै बार्सिलोनाको जित निश्चित गरे ।

जितसँगै बार्सिलोनाको १० खेलमा २८ अंक छ भने भ्यालेन्सियाले अलाभेसलाई हराएको भ्यालेन्सिया दोस्रो स्थानमा २४ अंकको साथमा दोस्रो स्थानमा छ । २० अंक सहित तेस्रो स्थानमा रहेको रियलले आज गिरोनाको सामना गर्दैछ ।