दिपेश तिमलसिना

कोलकाता  –इङ्ग्ल्यान्डले फिफा यु १७ विश्व कप फुटबलको उपाधि जितेको छ । स्पेनलाई आज ५-२ ले हराउँदै इङ्ग्ल्यान्डले उपाधि जितेको हो ।  दुई गोलले पछि परेको अवस्थालाई उल्ट्याउँदै इङ्ग्ल्यान्डले आफ्नो पहिलो यु-१७ विश्व कप जितेको हो ।

खेलको दशौँ र ३१ औँ मिनेटमा सर्जियो गोमेजले गोल गर्दै स्पेनलाई बलियो स्थितिमा पुर्‍याएका थिए । तर रायन ब्रुस्टरले पहिलो हाफको अन्तिमतिर गोल गर्दै इङ्ग्ल्यान्डलाई खेलमा फर्काउन खोजेका थिए ।

दोस्रो हाफमा भने इङ्ग्ल्यान्ड थप चार होल गर्न सफल रह्यो । मोर्गन गिब्ब्स-व्हाइटले ५८ औँ मिनेटमा गोल गर्दै खेल बराबरी पारेका थिए । त्यस्तै म्यानचेस्टर सिटीका युवा खेलाडि फिल फोडेनले ६९ औँ मिनेटमा गोल गर्दै इङ्ग्ल्यान्डलाई पहिलो पटक खेलमा अग्रता दिलाएका थिए ।

८४ औँ मिनेटमा मार्क ग्विहीले डिफेन्डर जोनाथन पान्जोको पासमा गोल गर्दै स्कोर ४-२ पारेका थिए । खेल सकिन केहि समय रहँदा फोडेनले फेरि गोल गर्दै इङ्ग्ल्यान्डको निकै आकर्षक कम-ब्याक पनि सुनिश्चित गरे ।

यस प्रतियोगितामा कुल ८ गोल गरेका रियान ब्रुस्टरले सर्वाधिक गोल गर्दै गोल्डेन बुट पाए भने फोडेन प्रतियोगिताको उत्कृष्ट खेलाडि घोषित हुँदै गोल्डेन बल जिते । त्यस्तै ब्राजिलले भने फेयर-प्लेको उपाधि जितेको हो । भारतमा आयोजित यस २३-दिने प्रतियोगिता ६ अक्टोबरदेखि सुरु भएको हो ।