म्यानचेस्टर (एजेन्सी) – प्रिमियर लिगमा म्यानचेस्टर युनाइटेडले टोटनह्यामलाई १–० ले हराउन सफल भएको छ । युनाइटेडको जितमा परिवर्तित खेलाडि एन्थोनी मार्सियालले निर्णायक गोल गरेका थिए ।

टोटनह्याम आफ्ना मुख्य स्ट्राइकर ह्यारी केनबिना मैदानमा उत्रिएकाले आक्रमणमा केहि फितलो देखियो । लिगका सर्वाधिक गोलकर्ता केनले यस खेल ह्यामस्ट्रिङ समस्याका कारण गुमाउन परेको थियो ।

खेलको पहिलो हाफमा दुवै टोलीले अवसरहरु पाए पनि तिनको सदुपयोग भने गर्न सकेका थिएनन् । दोस्रो हाफमा भने दुवै टोली अलि आक्रामक रुपमा प्रस्तुत भएका थिए ।

खेलको पहिलो राम्रो अवसर टोटनह्यामका डेले अल्लीले पाएका थिए । खेलको ७७ औँ मिनेटमा क्रिस्टियन एरिक्सनको डिन्क बललाई अल्लीले पोस्टभन्दा थोरै बाहिर हानेका थिए । त्यसको दुई मिनेटमै जेसे लिन्गार्डको पासमा रोमेलु लुकाकुको हेडर पोस्टमा लागेर फर्किएको थियो ।

खेलको मुख्य क्षण भने ८१ औँ मिनेटमा आयो । लुकाकुको पासमा सब्स्ट्युसनबाट आएका मार्सियालको प्रहारमा गोलकिपर ह्युगो लोरिस बिट हुन पुगेका थिए । मार्सियाल ७० औँ मिनेटमा मार्कोस रासफोर्डको ठाउँमा मैदान प्रवेश गरेका थिए ।

यस जितसँगै तालिकाको दोस्रोमा रहेको युनाइटेडको १० खेलमा २३ अंक रहेको छ भने तेस्रो स्थानमा रहेको टोटनह्यामको २० अंक रहेको छ ।