बिल्बाओ (एजेन्सी) – स्पेनिश ला लिगामा आज लिगको शीर्ष स्थानमा रहेको बार्सिलोना एथ्लेटिक बिल्बाओको सामना गर्दै छ । बिल्बाओको घरेलु मैदानमा खेलिने यस खेल नेपाली समय अनुसार रातिको १२.३० बजे सुरु हुने छ ।

बार्सिलोनाका लागि डिफेन्डर जोर्डि अल्बा फिट रहेकाले लुकास डिग्नेको साटो उनले टोलीमा स्थान बनाउन सक्ने छन् । त्यस्तै मेस्सी र स्वारेज सम्मिलित अग्रपंक्तिलाई जेरार्ड डेउलेफेउले पुन: साथ दिने देखिएको छ । उस्माने डेम्बेले घाइते भएको अवस्थामा अवसर पाएका डेउलेफेउले राम्रो प्रदर्शन गर्दै आएका छन् ।

त्यस्तै बिल्बाओका लागि मिकेल बालेनजियगा सामान्य चोटिल रहे पनि सुरुवात गर्ने सम्भावना छ । बिल्बाओ ९ खेलमा ११ अंकसहित तालिकाको एघारौँ स्थानमा रहेको छ । घरेलु मैदानमा भने बिल्बाओ पछिल्ला २२ मध्ये २० खेलमा विजयी रहेको छ ।

अर्को तर्फ बार्सिलोना २५ अंकसहित तालिकाको अग्रस्थानमा छ र आफ्ना पछिल्ला १६ मध्ये १५ खेल जितेको छ । बिल्बाओसँग अझ ३५ खेलमा बार्साले ३२ मा जित दर्ता पनि गरेको छ ।

आज राति ला लिगामा खेलिने अन्य खेलहरु:

एलाभेस विरुद्ध भ्यालेन्सिया – ४.४५ बजे

एट्लेटिको म्याड्रिड विरुद्ध भिल्लारियल – १०.१५ बजे

सेभिल्ला विरुद्ध लेगानेस – २.१५ बजे (राति)