वेस्ट ब्रोमविच (एजेन्सी) – प्रिमियर लिगको शीर्ष स्थानमा रहेको म्यानचेस्टर सिटी आज लिगको तेर्हौँ स्थानमा रहेको वेस्ट ब्रोमको सामना गर्दै छ । आज साँझ ७.४५ बजे सुरु हुने यस खेल वेस्ट ब्रोमको घरेलु मैदान हथर्न्स स्टेडियममा खेलिने छ ।

लिग कपमा वोल्भरह्याम्प्टनसँग १२० मिनेट खेलेका सर्जियो अगुएरो र रहिम स्टेर्लिङलाई प्रशिक्षक पेप ग्वार्डियोलाले विश्राम दिने सम्भावना छ । मध्य सातामा रहेको नेपोली विरुद्धको महत्त्वपूर्ण खेललाई पनि ध्यानमा राख्दै ग्वार्डियोलाले टोली चुन्ने छन् । मिडफिल्डर इल्के गुन्डोगन भने हालै घाइते भएकाले यस खेलमा सहभागी हुने छैनन् ।

घरेलु टोली भने मुख्य खेलाडिहरु घाइते भएकाले डिफेन्समा कमजोर देखिएको छ । वेस्ट ब्रोमका जोनी इभान्स, ग्यारेथ मिकली र क्रेग डसन चोटग्रस्त रहेका छन् ।सिटीले वेस्ट ब्रोमसँग पछिल्ला १२ खेल जितेको छ भने लिगमा लगातार सात खेलमा जित दर्ता गरेको छ ।

त्यस्तै सोही समयमा लिभरपुल र हडर्सफिल्ड पनि भिड्दै छन् । लिभरपुल गत साता टोटनह्यामसँग ४-१ ले हारेको थियो भने हडर्सफिल्डले म्यानचेस्टर युनाइटेडमाथि २-१ को जित निकालेको थियो । लिभरपुलका फिलिप कौटिन्हो घाइते छन् भने भ्रमणकारी टोलीका स्ट्राइकर स्टिभ मुनियले ५ खेलपछि यस खेलमा आगमन गर्न सक्ने छन् ।

प्रिमियर लिगमा आज खेलिने अन्य खेलहरु:

आर्सनल विरुद्ध स्वान्सि सिटी – ७.४५ बजे

वाटफोर्ड विरुद्ध स्टोक सिटी – ७.४५ बजे

क्रिस्टल प्यालेस विरुद्ध वेस्ट ह्याम – ७.४५ बजे