म्यानचेस्टर (एजेन्सी) – प्रिमियर लिगमा दोस्रो स्थानमा रहेको म्यानचेस्टर युनाइटेड आज तेस्रोमा रहेको टोटनह्यामसँग भिड्दै छ । नेपाली समय अनुसार बेलुकाको ५.१५ बजे सुरु हुने सो खेल युनाइटेडको घरेलु मैदान ओल्ड ट्राफोर्डमा खेलिँदै छ ।

टोटनह्यामले आज आफ्ना मुख्य स्ट्राइकर ह्यारी केनलाई ह्यामस्ट्रिङमा चोटका कारण गुमाउने छन् । उनको स्थान हिउङ-मिन सन अथवा फर्नान्डो लोरेन्टेले लिने सम्भावना छ । त्यस्तै डिफेन्डर ड्यानि रोज र मिडफिल्डर मुसा डेम्बेले भने चोटपछि टोलीमा फर्किँदै छन् ।

अर्को तर्फ गत साता हडर्सफिल्ड विरुद्ध यस सातको पहिलो हार बेहोरेको घरेलु टोलीका लागि डिफेन्डरद्वय फिल जोन्स र एरिक बाई दुवै टोलीमा आगमन गर्न सक्ने छन् । पल पोग्बा, मरोएने फेलाइनी र माइकल क्यारिक भने अझै घाइते रहेका छन् ।

युनाइटेड आफ्ना पछिल्ला २१ घरेलु खेलहरुमा अपराजित छ भने स्पर्सको अघिल्लो ६ अवे खेलहरु सबैमा जित रहेको छ र उसले प्रिमियर लिगमा पनि लगातार चार खेल जितेको छ ।

युनाइटेडका प्रशिक्षक जोसे मौरिन्होले महत्त्वपूर्ण खेलहरुमा रक्षात्मक खेल प्रस्तुत गर्ने गरेकाले यस खेलमा पनि उस्तै प्रदर्शनको अपेक्षा गर्न सकिने छ । उता तर्फ केनबिना स्पर्सलाई यस खेलमा सकारात्मक नतिजा निकाल्न निकै चुनौतिपूर्ण हुने देखिएको छ ।