एजेन्सी – इङ्ग्लिस फुटबल लिग (इएफएल) कप अन्तर्गत प्रिमियर लिग टोली म्यानचेस्टर युनाइटेड, म्यानचेस्टर सिटी र आर्सनलले आ–आफ्नो खेलमा जित दर्ता गरेका छन् । क्रिस्टल प्यालेस भने हार बेहोर्दै प्रतियोगिताबाट बाहिरिएको छ ।

गए राति खेलिएको खेलमा म्यानचेस्टर युनाइटेडले अर्को प्रिमियर लिग टोली स्वान्सि सिटीलाई २–० ले हराउन सफल रह्यो । युनाइटेडको यस जितमा फरवार्ड जेसे लिन्गार्डले दुवै गोल गरेका थिए ।

त्यस्तै प्रिमियर लिगको शीर्ष स्थानमा रहेको म्यानचेस्टर सिटी वुल्भरह्याम्प्टन वान्डरर्ससँग पेनाल्टिमा ३–१ ले विजयी रह्यो । नियमित समयमा कुनै गोल हुन नसक्दा खेल अतिरिक्त समय हुँदै पेनाल्टी सुट–आउटसम्म पुगेको थियो ।

त्यस्तै आर्सनलले पनि नर्विचमाथि संघर्षपूर्ण जित निकाल्यो । खेलमा पछि परेको अवस्थालाई उल्ट्याउँदै आर्सनल २–१ को जित दर्ता गर्न सफल भएको थियो । आर्सनलको जितमा दुवै गोल सब्स्टिट्युसनबाट आएका १८–वर्षे एडि निकेतिआहले गरेका थिए ।

यसै गरी लेस्टर सिटीले लिड्सलाई ३–१ ले हरायो भने बर्नमाथले मिडल्सब्रोलाई पनि ३–१ कै अन्तरले हराउन सफल भयो । प्रिमियर लिग टोलीमध्ये चौथो चरणबाटै बाहिरिनेमा क्रिस्टल प्यालेस मात्र पर्‍यो । प्यालेस ब्रिस्टोल सिटीसँग ४–१ ले पराजित हुन पुगेको थियो ।