काठमाडौं (हाम्रो खेलकुद) – झन्डै दुई महिना पछि राजधानीमा हुने भनिएको एभरेष्ट प्रिमियर लिग (इपिएल) क्रिकेटलाई यसपटक टिभिएस मोटर कम्पनीले प्रायोजन गरेको छ ।

इपिएलका प्रबन्ध निर्देशक आमिर अख्तर र टिभिएस मोटरको नेपालका लागि आधिकारिक विक्रेता जगदम्बा मोटर्स प्रालिका प्रबन्ध निर्देशक साहिल अग्रवालले आज सम्झौता पत्र एकअर्कासँग साटेका थिए । अब प्रतियोगिताको नाम टिभिएस इपिएल रहने भएको छ ।

सम्झौता पत्रमा पहिले नै हस्ताक्षर बताइएको कार्यक्रममा सम्झौता रकम भने खुलाइएन् । विजेताले २१ लाख रुपैयाँ पाउने यसअघि नै घोषणा गरिएको थियो भने इपिएलको म्यान अफ दी सिरिजले टिभिएसको मोटसाइकल प्राप्त गर्ने इपिएलका प्रबन्ध निर्देशक अख्तरले जानकारी दिए ।
‘पुरस्कार राशी, मोटरसाइकल र अन्य विषयमा पनि उहाँहरुको सहयोग रहेको छ ’ अख्तरले भने, ‘ यी सबै प्रायोजनमा समेटिएका छन् । हामी यो सम्झौताबाट खुसी छौं । तर, हामी सम्झौता रकम भने उल्लेख गर्न सक्दैनौं ।’ टिभिएसको प्रायोजन यो वर्षका लागि रहेको र भविष्यमा निरन्तरता पाउन सक्ने अख्तरले जानकारी दिए ।

जगदम्बा मोर्टसका प्रबन्ध निर्देशक अग्रवालले टिभिएस मोर्टस र आफ्नो कम्पनीले नेपाली क्रिकेटको विकासका लागि सहकार्य गरेको बताए । उनले भने, ‘यो सहकार्यले नेपाली क्रिकेटको बढवाका र युवा क्रिकेट खेलाडीको विकासका लागि लागि सहयोग पुग्ने हामीले विश्वास लिएका छौं ।’
टिभिएस मोर्टसका वरिष्ठ उपाध्यक्ष आर दीलिपले टिभिएस भारतीय क्रिकेटमा लामो समयदेखि सहकार्यमा रहेको र नेपालमा पनि त्यसको सुरुआत गर्न पाउँदा खुसी लागेको बताएका छन् ।

६ शहरको नाममा सहभागिता रहेको इपिएलको सोमबार अक्सनमार्फत हरेक टोलीले १० खेलाडी किनिसकेका छन् । राष्ट्रिय टोलीका सन्दीप लामिछाने, विनोद भण्डारी , आरिफ शेख र करण केसी अधिकत्तम १ लाख ७५ हजार रुपैयाँमा विक्रि भइसकेका थिए ।

राष्ट्रिय टोलीका कप्तान पारस खड्का, उपकप्तान ज्ञानेन्द्र मल्ल, शरद भेषावकर, शक्ति गौचन, विनोद भण्डारी र सोमपाल कार्मी यसअघि नै अलग अलग टोलीको मार्की खेलाडी त्यसअघि नै छनोट भइसकेका छन् । दुई साता भन्दा लामो समय चल्ने इपिएलमा काठमाडौं किङ्गस, ललितपुर प्याट्रीयट्स, विराटनगर वारियर्स, भैरहवा ग्लाडीयटर्स, चितवन टाइगर्स र पोखरा राइनोजले प्रतिस्पर्धा गर्नेछन् ।

कीर्तिपुरस्थित त्रिभुवन विश्व विद्यालयको मैदानमा हुने इपिएल राउन्ड रोविनका आधारमा हुने र शीर्ष ४ टोली प्ले अफमा पुग्नेछन् ।