बेथानचोक/काभ्रे (हाम्रो खेलकुद)– अनन्त जीवन युवा क्लबले ढुंखर्क फाइभ ए साइड फुटबल प्रतियोगिताको उपाधि जितेको छ । बेथानचोक २ ढुंखर्कको पार्वती माविको मैदानमा आइतबार पेप्सी ब्वाइजलाई टाइब्रेकरमा ३–२ ले हराउँदै अनन्त जीवनले उपाधि जितेको हो ।

निर्धारित ६० मिनेटको खेल २–२ को बराबरीमा टुंगिएपछि खेल टाइब्रेकरमा गएको थियो । अनन्त जीवनले २–० को अग्रता जोगाउन नसक्दा खेल बराबरीमा पुगेको थियो । प्रकाश तामाङ र अनिष तामाङको गोलमा अनन्त जीवनले अग्रता लिएको थियो । तर दोस्रो हाफमा सञ्जिव लामाले २ गोल गर्दै टोलीलाई खेलमा फर्काएका थिए ।

त्यसअघि आयोजक ढुंखर्क फटबल क्लबलाई टाइब्रेकरमा ३–२ ले नै हराउँदै गणेश स्थानले तेस्रो स्थान प्राप्त गरेको थियो । निर्धारित समय २–२ को बराबरीमा टुंगिएपछि पेनाल्टीमा गणेश स्थानले बाजी मारेको थियो । अनन्त जीवनले उपाधिसहित २५ हजार, पेप्सीले १५ र गणेश स्थानले १० हजार रुपैयाँ प्राप्त गरे । सञ्जिव लामा प्रतियोगिताको सर्वोत्कृष्ट खेलाडी चुनिदा सूर्य सुनुवार उत्कृष्ट फरवार्ड, राजन लामा उत्कृष्ट रक्षक र सुवास तामाङ उत्कृष्ट गोलकिपर घोषित भए ।

प्रतियोगिताको विजेता उपविजेता र तेस्रो हुने टोलीका खेलाडीलाई बेथानचोक गाँउ पालिकाका अध्यक्ष प्रेमबहादुर तिमल्सिना, वडा अध्यक्षहरु भगवान घिमिरे, दीलबहादुर श्रेष्ठ, लालबहादुर लामा पार्वती माविका प्रधानाध्यापक गोविन्द शर्मा लगायतले पुरस्कृत गरे । पाँच दिने प्रतियोगितामा २९ टोलीको सहभागिता रहेको क्लबका अध्यक्ष विवेक तिमल्सिनाले जानकारी दिए ।