उडिन (एजेन्सी) – इटालियन सेरिआमा गए राति साविक विजेता युभेन्टसले उडिनिसलाई ६-२ ले हराएको छ । युभेन्टसको आकर्षक जितमा मिडफिल्डर सामि खेडिराले आफ्नो करियरको पहिलो ह्याट्रिक पनि गरे ।

घरेलु टोली उडिनिसले आठौं मिनेटमा सेटिप पेरिकाद्वारा खेलमा अग्रता लिएको थियो । तर उडिनिसका डिफेन्डर समिरको आत्मघाती गोलले युभेन्टस खेलमा फर्केको थियो । त्यस्तै बीसौँ मिनेटमा जुवान क्वाड्राडोको पासमा हेडर गर्दै जर्मनीका खेडिराले आफ्नो टोलीलाई अग्रता दिलाएका थिए ।

खेलमा फर्किँदै गर्दा भ्रमणकारी टोली १० खेलाडीमा सीमित भएको थियो । फरवार्ड मारियो मान्डजुकिचले २६ औँ मिनेटमा खेलको दोस्रो पहेंलो कार्ड पाउँदै मैदान छाडेका थिए । त्यसको फाइदा उठाउँदै ड्यानिलोले गोल गरे र उडिनिसलाई फेरि खेलमा फर्काएका थिए ।

त्यसपछि भने युभेन्टसलाई रोक्न असम्भव नै देखियो । दोस्रो गोल खाएको १५ मिनेटमै ड्यानियल रुगानि र सामि खेडिराले गोल गर्दै स्कोर ६० मिनेटसम्म स्कोर ४-२ बनाएका थिए । यसैगरी खेलको ८७ औँ मिनेटमा सामि खेडिराले गोन्जालो हिग्वाइनको पासमा पुन: गोल गर्दै आफ्नो पहिलो करियर ह्याट्रिक पनि दर्ता गरे ।

त्यसको तीन मिनेटमा मिरालेम पाज्निचले अलेक्स सान्ड्रोको पासलाई सदुपयोग गर्दै गोल गरे र युभेन्टसको शानदार कमब्याक र ३ अंक दुवै सुनिश्चित गरे । यस जितसँगै युभेन्टस सेरिआको तालिकको तेस्रो स्थानमा छ भने उडिनि सपन्ध्रौँ स्थानमा झरेको छ ।

तालिकाको शीर्ष स्थानमा भने २५ अंकसहित यस सिजन लिगमा अपराजित रहेको नेपोली रहेको छ । नेपोली र दोस्रो स्थानमा रहेको इन्टर मिलानले यस साता गोलरहित बराबरी खेल्दा युभेन्टसलाई फाइदा पनि पुगेको छ ।