म्याड्रिड (एजेन्सी) – स्पेनिश ला लिगाको तेस्रो स्थानमा रहेको रियल म्याड्रिड आज खराब लयमा रहेको एबारको सामना गर्दै छ । नेपाली समय अनुसार राती १२.३० बजे सुरु हुने यस खेल रियल म्याड्रिडको घरेलु मैदानमा खेलिने छ ।

रियल बेटिससँगको १-० को हारपश्चात तीन खेल लगातार जित्दै रियल म्याड्रिड राम्रो लयमा देखिएको छ भने आफ्ना पछिल्ला ४ खेलमा जितविहीन रहेको एबार ८ खेलमा सात अंकसहित तालिकाको १६ औँ स्थानमा रहेको छ । मालागासँग २-० ले जित्दै अग्रस्थानमा रहेको बार्सिलोनासँग अन्तर कम गर्न रियल म्याड्रिडलाई यो खेलमा जित्नै पर्ने दबाब पनि रहेको छ ।

रियलका गोलकिपर केलर नाभास चोटका कारण यस खेलमा सहभागी हुने छैनन् र उनको स्थान किको क्यासिल्लाले लिने छन् । डिफेन्डर राफायल भरान पनि चोटपछि यस खेलमा आगमन गर्ने सम्भावन रहेको छ । त्यस्तै ग्यारेथ बेल भने अझै चोटका कारण बाहिरै रहेका छन् ।

एबारका लागि भने इभान रामिस चोटका कारण जनवरीसम्म नफर्किने बताइएको छ र इभान आलेयो पनि घाइते रहेकाले खेलमा सहभागी हुने छैनन् । डिफेन्समा खेलाडीहरु घाइते रहेकाले प्रशिक्षक जोसे मेन्डिलिबारले टोलीमा केहि हेरफेर गर्न सक्ने छन् ।

रियल म्याड्रिडले एबारसँग पछिल्ला ७ मध्ये ६ खेल जितेकाले घरेलु टोलीलाई रोक्न एबारलाई चुनौतीपूर्ण हुने देखिन्छ । यस खेल सोनी टेन २ बाट प्रत्यक्ष प्रसारण पनि हुने छ ।

ला लिगाका अन्य खेलहरुको समय तालिका (नेपाली समय अनुसार):

भिल्लारियल विरुद्ध लास पाल्मास – ३.४५ बजे

सेल्टा भिगो विरुद्ध एथ्लेटिको म्याड्रिड – ८ बजे

लेगानेस विरुद्ध एथ्लेटिक बिल्बाओ – १०.१५ बजे