म्यानचेस्टर (एजेन्सी) – प्रिमियर लिगमा म्यानचेस्टर सिटीले बर्नलीसँग ३-० को जित दर्ता गर्दै अंकतालिकाको शीर्ष स्थानमा आफ्नो पकड अझ बलियो बनाएको छ । सिटिका लागि सर्जियो अगुएरो, निकोलस ओटामेन्डि र लेरोय सानेले गोल गरेका थिए ।

बर्नलीका गोलकिपर निक पोपले बर्नार्डो सिल्भालाई लडाउँदा सिटीले २९ औं मिनेटमा पेनाल्टी पाएको थियो । सो पेनाल्टीलाई सर्जियो अगुएरोले गोलमा परिणत गर्दै क्लबकै सर्वाधिक गोल रेकर्ड पनि बराबरी बनाएका थिए । पहिलो हाफमा बर्नलीले आफ्ना मुख्य स्ट्राइकर क्रिस वुडलाई चोटका कारण गुमाउन पनि परेको थियो ।

अघिल्ला केहि खेलहरु जस्तो आक्रामक नदेखिए पनि सिटी दोस्रो हाफमा थप दुई गोल गर्न सफल भएको थियो । सानेको कर्नरमा ओटामेन्डिले हेडर गर्दै अग्रता दोब्बर बनाएका थिए भने दोस्रो गोलको दुई मिनेटभित्र ७५ औँ मिनेटमा साने आफैंले गोल गर्दै सिटीका लागि जित सुनिश्चित पारेको थिए ।

यस जितसँगै सिटीको ९ खेलमा २५ अंक रहेको छ । म्यानचेस्टर युनाइटेड हडर्सफिल्डसँग २-१ ले हारेकाले सिटीले दोस्रो स्थानमा रहेको युनाइटेड माथि ५ अंकको अग्रता बनाएको हो ।

प्रिमियर लिगका अन्य खेलहरुको नतिजा:

न्युकासल युनाइटेड १-० क्रिस्टल प्यालेस

स्टोक सिटी १-२ बोर्नमथ

स्वान्सि सिटी १-२ लेस्टर सिटी