लण्डन (एजेन्सी) – प्रिमियर लिगमा आज साविक विजेता चेल्सी लयमा रहेको वाटफोर्डको सामना गर्दै छ । चेल्सीको घरेलु मैदान स्ट्यामफोर्ड ब्रिजमा खेलिने सो खेल नेपाली समय अनुसार साँझ ५.१५ बजे सुरु हुने छ ।

प्रिमियर लिगमा म्यानचेस्टर सिटी र क्रिस्टल प्यालेस विरुद्ध दुई लगातार हार पश्चात चेल्सी आज वाटफोर्डसँग भिड्दै छ । वाटफोर्ड चेल्सीका लागि कुनै सजिलो प्रतिद्वन्दि भने हुने छैन । अघिल्लो खेलमा आर्सनललाई २-१ ले हराएको वाटफोर्ड ८ खेलमा १५ अंकसहित चेल्सीभन्दा एक स्थानमाथि चौथो स्थानमा रहेको छ ।

आफ्ना मुख्य फरवार्ड अल्भारो मोराटा घाइते रहँदा चेल्सीले लगातार दुई हार बेहोरेको थियो । उनी र अर्का स्टार खेलाडी एडेन हाजार्ड फिट हुँदै फर्केकाले चेल्सीका लागि यो राम्रो खबर हुने छ । तर टेमो बाकायोके र एन्गोलो कान्टे लगायत मिडफिल्डर घाइते रहँदा चेल्सीको मिडफिल्ड अलि कमजोर देखिएको छ ।

चेल्सी विरुद्ध पछिल्ला १० मध्ये वाटफोर्डले ८ खेल गुमाए पनि यो सिजन वाटफोर्ड निकै बलियो देखिएको छ । आफ्नो टोलीको लय नबिगार्न वाटफोर्डका प्रशिक्षक मार्को सिल्भाले खासै परिवर्तन नगर्ने देखिन्छ । फरवार्ड लाइनमा भने आन्द्रे ग्रेको ठाउँमा अघिल्लो खेलमा गोल गरेका ट्रोय डिनी खेल्ने सम्भावना धेरै छ ।