म्यानचेष्टर (एजेन्सी)– म्यानचेष्टर युनाइटेडका प्रशिक्षक जोजे माउरिन्होले ज्लाटान इब्राहिमोभिच यो वर्षको अन्त्यअघि नै मैदान फर्कने विश्वास गरेका छन् । चोटमुक्त हुने प्रयासमा रहेका इब्राहिमोभिचले यो साता बलका साथ सामान्य अभ्यास थालेका छन् ।

इब्राहिमोचिले डिसेम्बरको सुरुआत सम्म आफु फर्कने विश्वास गरेका थिए । तर, माउरिन्होले भने उनी जनवरीको अगाडि मैदान फर्कने विश्वास व्यक्त गरेका छन् । अप्रिलमा एन्डरलेकविरुद्ध युरोपा लिग खेल्ने क्रममा उनको घुँडामा चोट लागेको थियो ।  चोटग्रस्त अवस्थामै युनाइटेडसँग उनले पुनः यो सिजनका लागि सम्झौता गरेका थिए ।

‘ज्लाटान फर्कनेछन् । उनले यहाँ चोटमुक्त हुनका लागि प्रयास गरिरहेका छन् । आशा गरे अनुरुप नै सबै चिज अघि बढेको छ’, माउरिन्होले भने, ‘अर्को साता वा अझै केही साता उनी फर्कने छैनन् । उनलाइ अझै केही समय दिनुपर्दछ । मलाई यो पनि विश्वास छ की उनी सन् २०१७ भित्रै मैदान फर्कनेछन् ।’

स्वीडेनका स्ट्राइकर इब्राहिभोभिचले गत सिजन युनाइटेडबाट ४६ खेलमा २८ गोल गरेका थिए । युरोपा लिगको उपाधि इब्राहिमोभिचको खेल जीवनको ३३ औं महत्वपूर्ण उपाधि हो । स्वीडेनका पूर्व कप्तान समेत रहेका उनले सन् २००१ मा आयक्सबाट खेल जीवनको सुरुआत गरेका थिए । त्यसयता उनी कुनै सिजन उपाधि विहिन हुन परेको छैन ।