काठमाडौं (हाम्रो खेलकुद)– राष्ट्रिय फुटबल टोलीका गोलकिपर किरण चेम्जोङको माल्दिभियन टोली टिसी स्पोर्टसले धिवेही प्रिमियर लिग (डिपिएल) को उपाधि दौडलाई बलियो बनाउँदै लगेको छ ।

हिजो भएको खेलमा किरण सम्मिलित टोलीले तिनादुलाई प्रतिस्पर्धात्मक खेलमा ३–२ ले हाउँदै केही समयका लागि लिगको शीर्षस्थानमा उक्लेको थियो । यद्दपी अर्को खेलमा सफलता प्राप्त गर्दै माजिया पुनः शीर्षस्थानमा उक्ले पछि टिसी दोस्रो स्थानमा झरेको छ । दुवैको समान १९ अंक भएपछि गोलअन्तरमा माजिया पहिलो र टिसी स्पोर्टस् दोस्रो स्थानमा रहेको छ ।

खेल सकिन ११ मिनेट बाँकी रहँदा इब्राहिम माहुदीले गोल गरेपछि टिसी स्पोर्टसको जित सम्भव भएको थियो । पहिलो हाफ गोलरहित बराबरीमा सकिएको खेलमा अग्रता भने टिसी स्पोर्टसले लिएको थियो । कोर्लियुस स्टेवार्टले ५२ औं मिनेटमा गोल गर्दै टिसीलाई अग्रता दिलाए भने छ मिनेटपछि उनले नै दोस्रो गोल गरे  ।

तर, ६५ औं मिनेटमा अहमद रिजुवानले गोल गर्दै गोलअन्तर घटाए । ७७ औं मिनेटमा जोसे अभिलाले हेड गोल गर्दै तिनादुलाई खेलमा फर्काए । तर, त्यो बराबरी लामो समय रहेन । ७९ औं मिनेटमा इब्राहिमले गोल गर्दै टिसी स्पोर्टसलाई महत्वपूर्ण जित दिलाए ।

‘हामीले हरेक खेलमा मेहनत गरेका छौं र त्यहि अनुसारको सफलता पनि मिलेको छ’ शुक्रबार मात्र नेपालबाट माल्दिभ्स पुगेका किरणले हाम्रो खेलकुदसँग भने,‘यहाँ उपाधिका लागि मुख्य तीन टोलीबीच प्रतिस्पर्धा छ । तुलानात्मक रुपमा हामी त्यति बलियो टोली होइनौं । तर पनि सबैको मेहनतले हामी अघि बढिरहेका छौं ।’

किरणले माजियासँग हुने अबको खेल महत्वपूर्ण हुने बताए । लिगका ६ खेल बाँकी रहेको अवस्थामा उनले भने ‘त्यो खेल जित्न सकेको खण्डमा उपाधि जित्ने सम्भावना रहन्छ । ’ ८ खेलमा सामन ६ जित हासिल गरेका माजिया र टिसी दुवैले १ बराबरी र अर्को खेलमा हार बेहोरेका छन् । गोलअन्तरमा माजिया अगाडि छ । एक खेल कम खेलेको न्यू रेडियन्ट एससीको १८ अंक छ । आज हुने खेल जितेमा न्यू रेडियन्ट शीर्षस्थानमा उक्लनेछ ।