म्यानचेस्टर (एजेन्सी)– म्यानचेस्टर सिटीले प्रिमियर लिगमा आज स्टोक सिटीमाथि गोलको बर्षा गरेको छ । गाब्रियल जिससले २ गोल गरेको खेलमा सिटीले स्कोटलाई ७–२ ले हराएको छ । जितसँगै सिटी पुनः अंक तालिकाको शीर्षस्थानमा उक्लेको छ भने सहरी प्रतिद्वन्द्वि म्यानचेस्टर युनाइटेड दोस्रो स्थानमा झरेको छ ।

आजै केहि घन्टा अघि सकिएको खेलमा युनाइटेडले लिभरपुलसँग गोलरहित बराबरी खेलेको थियो । १७ औं मिनेटमा जिससको गोलबाट अग्रता लिएको सिटीका लागि त्यसको २ मिनेट पछि नै रहिम स्टर्लिङ गोल गरे । डेभिड सिल्भाले २७ औं मिनेटमा गोल थपे ।

मामे विराम डिओफले स्टोकका लागि ४४ औं मिनेटमा गोल फर्काएपछि सिटीले पहिलो हाफमा ३–१ को अग्रता बनाएको थियो । एकपक्षिय खेलको ४७ औं मिनेटमा कायले वाकरको आत्मघाती गोलमा स्टोकले गोलअन्तरलाई साँघुरो पार्यो । तर, त्यो गोलअन्तर लामो समय टिकेन ।

जिससले ५५ औं मिनेटमा अर्को गोल गरे । त्यसपछि फर्नान्डिन्होले ६० औं, लेरोय सानेले ६२ औं र बेनार्डो सिल्भाले ७९ औं मिनेटमा गोल गरेपछि सिटीको विजयी अन्तर फराकिलो भएको थियो । ८ खेलमा सातौं जित दर्ता गरेको सिटीको २२ अंक छ भने युनाटेडको २० अंक छ । यी दुई टोलीमात्र अहिले सम्म प्रिमियर लिगमा अपराजित रहेका छन् । १५ औं स्थानमा रहेको स्टोकको ८ अंक छ ।