डिजोन (एजेन्सी) – आज फ्रान्सेली लिग १ मा अंक तालिकाको शीर्ष स्थानमा रहेको पेरिस सेन्ट जर्मन (पिएसजी) डिजोनको सामना गर्दै छ । पिएसजी यस सिजन अपराजित रहेको छ भने खराब लयमा रहेको डिजोनको ८ खेलमा केवल एक जित छ ।

लिगको पछिल्लो खेलमा बोर्डोमाथि ६–२ को शानदार जित दर्ता गरेको पिएसजीका लागि जाभियर पास्टोरे र थियागो सिल्भा चोटबाट फर्किँदै छन् भने मार्को भेराट्टि टोलीमा आगमन गर्ने छन् । डिफेन्डर ड्यानी एल्भेसलाई भने प्रशिक्षक उनाई एम्रिले बुधबारको च्याम्पियन्स लिग खेलका लागि विश्राम दिने सम्भावना छ ।

अर्को तर्फ डिजोनका लागि डिफेन्डर सेड्रिक याम्बेरे रातो कार्ड पाएकाले निलम्बनमा परेका छन् । भरपर्दा डिफेन्डर याम्बेरे बिना डिजोनलाई थप समस्या हुने देखिएको छ । उनको स्थान सेड्रिक भरल्ट वा एडम ल्याङले लिने छन् भने डिजोनले अरु खासै परिवर्तन नगर्ने सम्भावना छ ।

यस सिजन पिएसजी तुलनात्मक रुपमा कमजोर रहेको विपक्षीमाथि निकै हावी देखिएका कारण नेयमार, एडिन्सन काभानी र किलियन बाप्पे सम्मिलित फरवार्ड लाइन फेरि पनि खेलमा चम्किने देखिन्छ । यस सिजन सबै प्रतियोगितामा काभानीको ११ गोल छ भने नेयमारको ८ तथाबाप्पेको ६ गोल रहेको छ ।

डिजोन विरुद्ध पिएसजीले आफ्ना पछिल्ला चार खेल पनि जितेको छ । नेपाली समय अनुसार यस खेल रातिको ८.४५ बजे सुरु हुने छ । खेल सोनी इएसपिएन एचडिमा प्रत्यक्ष प्रसारण हुने छ ।