लिभरपुल (एजेन्सी) – प्रिमियर लिगमा आज बेलुका उपाधि दाबेदार मानिएका दुई टोलि लिभरपुल र म्यानचेस्टर युनाइटेड आम्ने-साम्ने हुँदैछन् ।लिभरपुलको घरेलु मैदान एनफिल्डमा खेलिने सो खेल नेपाली समय अनुसार ५.१५ बजे सुरु हुने छ ।

यस सिजन निकै राम्रो लयमा रहेको म्यानचेस्टर युनाइटेड सिजनका ७ खेलमा १९ अंक बटुल्दै दोस्रो स्थानमा रहेको छ । लिगको आफ्नो अघिल्लो खेलमा युनाइटेडले क्रिस्टल प्यालेसमाथि ४-० को फराकिलो जित हांसिल गरेको थियो ।

म्यानचेस्टर युनाइटेडले यस खेलमा आफ्ना मिडफिल्डर मरोएने फेलाइनीलाई घुँडाको चोटका कारण गुमाउने छ । त्यस्तै डिफेन्डर फिल जोन्स पनि चोटिल रहेका कारण नखेल्ने सम्भावना रहेको छ । युनाइटेडका लागि पल पोग्बा भने चोटका कारण लामो समयका लागि बाहिरै छन् ।

त्यस्तै ७ खेलमा ३ जित र ३ बराबरी खेलेको लिभरपुल १२ अंक जोड्दै तालिकाको सातौँ स्थानमा रहेको छ । स्टार मिडफिल्डर साडियो माने राष्ट्रिय टोलिबाट खेल्दा घाइते भएको समाचारले भने लिभरपुललाई ठुलो धक्का लागेको छ ।

यस सिजन मिश्रित नतिजा निकाले पनि लिभरपुल घरेलु मैदानमा निकै बलियो देखिएको छ । उसले एनफिल्डमा खेलिएका पछिल्ला ३० खेल मध्ये मात्र दुई खेल गुमाएको छ । त्यसैले लिभरपुलले आफ्नो लामो समयको प्रतिद्वन्दि म्यानचेस्टर युनाइटेडलाई हराउँदै सिजनलाई लयमा ल्याउन खोज्ने छ भने युनाइटेड आफ्नो अपराजित यात्रालाई निरन्तरता दिन खोज्ने छ ।