पेरिस (एजेन्सी) – विश्वकप छनोट अन्र्तगतको युरोपियन छनोटको अन्तिम खेलमा फ्रान्स विजयी भएको छ । युरोेपियन छनोट अन्र्तगतको समूह ‘ए’ बाट यसअघि नै विश्वकपमा स्थान बनाइसकेको फ्रान्सले बेलारुसलाई २–१ ले पराजित गरेको हो । तीनै गोल पहिलो हाफमा सम्भव भएको थियो ।

घरेलु टोलीलाई जिताउन एन्टेनियो ग्रिजम्यान र ओलिभर जिरउडले गोल गरे । पराजित टिमका लागि एन्टोन सारोकाले सान्त्वना गोल फर्काए । २७ औं मिनेटमा एन्टेनियो ग्रिजम्यानको गोलबाट अग्रता लिएको फ्रान्सले ३३ औं मिनेटमा जिरउडको गोलबाट अग्रता दोब्बर पारेको थियो । म्याथुडिको क्रस पासलाई ग्रिजम्यानले सदुपयोग गर्दा जिरउडले ग्रिजम्यानको पासलाई सदुपयोग गरेका थिए । ४४ औं मिनेटमा बेलारुसका सारोकाले गोल गर्दै खेलमा फर्कने संकेत दिएका थिए । तर, दोस्रो हाफमा दुवै टिमले गोल गर्न नसक्दा फ्रान्सले खेल २–१ आफ्नो पक्षमा पार्यो ।

यसै समूहबाट नेदरल्याण्डसँग पराजित भएपनि स्वीडेनले प्ले अफमा स्थान बनाएको छ । नेदरल्याण्डमा खेलिएको खेलमा स्वीडेन २–० ले पराजित भएको थियो ।

नेदरल्याण्डका लागि दुवै गोल आर्जेन रोवेनले गरेका थिए । १६ औं मिनेटमा पेनाल्टीमार्फत पहिलो गोल गरेका रोबेनले ४० औं मिनेटमा दोस्रो गोल गरेको थियो । त्यही दुई गोल नै नेदरल्याण्डको जितमा पर्याप्त बन्यो । जितपछि पनि नेदरल्याण्ड विश्वकपलाई छनोट हुन सकेन ।

विश्वकपको लागि पनि प्ले अफमा स्थान बनाउन स्वीडेनलाई कम्तीमा ७–० ले पराजित गर्नुपर्ने थियो । तर, खेलमा त्यस्तो हुन सकेन । यसै समूहको अर्काे खेलमा लक्जेमवर्ग र बुल्गेरियाले १–१ गोलको बराबरी खेल्दै अंक बाँडे ।