हेब्रोन (एजेन्सी) – एएफसी एसियन कप छनोट चरण अन्तर्गत समूह ‘डी’ को  खेलमा भुटानले प्यालेस्टाइनसँग १०-० को हार बेहोरेको छ । यसअघि घरेलु मैदानमा भुटान प्यालेस्टाइनसँग   २-०  ले पराजित भएको थियो । छनोट अन्तर्गत चार खेलमा भुटानको चौथो हार हो ।

एकपक्षीय खेलमा प्यालेस्टाइनका लागि अब्देलतिफ बधरीले ह्याट्रिक प्रहार गरे भने जोनाथन कान्टीलानाले दुइ गोल प्रहार गरे । त्यस्तै अब्दल्ला गाबेर , तामेर सेयाम , समेह मराबा , खालेद सलिम र मोहम्मद नाटोरले पनि गोल गरे ।

यसै समूहको अर्को खेलमा दक्षिण एसियाली राष्ट्र माल्दिभ्सले ओमानको सामना गर्दैछ ।

अफघानिस्तानले जोर्डनलाई बराबरीमा रोक्यो

समूह सी को खेलमा घरेलु टोली अफघानिस्तानले बलियो जोर्डनसँग ३-३ को बराबरी गरेको छ । अफघानिस्तानले खेलमा दुई पटक अग्रता गुमाएको थियो । खेलको १५ औं मिनेटमा अमिरुद्दीन शरिफीको गोलमा अफघानिस्तानले अग्रता लिएको थियो भने मोन्थर अबु अमाराले ४० औं मिनेटमा बराबरी गोल गरेका थिए । जोर्डनका ओडाइ अल-साइफीले ४३ औं मिनेटमा पेनाल्टी मार्फत गोल गर्दै अग्रता दिलाएका थिए ।

दोस्रो हाफमा जोर्डनले ६४ औं र ८० औं मिनेटमा गोल खादै खेलमा पछि परेको थियो । हरुन फकुरुद्दीनको गोलमा बराबरी गरेपछि खैबार अमानीले अग्रता दिलाएका थिए । तर अग्रता जोगाउन नसक्दा अफघानिस्तानले जित्ने अवसर गुमायो ।

अफघानिस्तान ४ खेलमा २ अंक सहित समूहको पुछारमा छ भने जोर्डन ८ अंक सहित शिर्षस्थानमा छ ।